Qanuna dəyişiklik “PAŞA Həyat”a 200 mln. manat civarında ziyan vura bilər

1 yanvar 2025-ci il tarixindən dövlət sektorunda çalışanların həyatın yığım sığortası sahəsində vergi və sosial sığorta ilə bağlı güzəştləri ləğv edilir. 

Valyuta.az xəbər verir ki, bununla bağlı qanun layihəsi bu gün Milli Məclisdə qəbul edilib.  

Bu dəyişiklik nəticəsində dövlət büdcəsinin və Dövlət Sosial Müdafiə Fondunun gəlirlərinin artacağı gözlənilsə də, sığorta bazarına, xüsusilə də həyat sığortasına fokuslanan iri şirkətlərin yığımlarına mənfi təsir edəcək. 

Belə ki, dövlət sektorunda çalışanlar ümumi işləyən əhalinin təxminən 50%-i civarındadır. Bu isə o deməkdir ki, həyat sığorta şirkətləri potensial müştərilərinin yarısını gələn ildən itirmiş olacaq. Bunu Mərkəzi Bankın sədri Taleh Kazımov da təsdiqləyib. O bundan əvvəl keçirdiyi mətbuat konfransında həyatın yaşam sığortası üzrə yeni müqavilələrin 50%, yığımların isə 60% civarında azalacağını açıqlamışdı. 

Sığorta ekspertləri hesab edir ki, sözügedən dəyişiklik daha çox “PAŞA Həyat” sığorta şirkətinə ziyan vuracaq. Belə ki, həyatın yaşam sığortası bazarın təxminən 75%-i bu şirkətin əlində cəmləşib. Sığorta şirkətinin yığımlarının illik 500 milyon manat civarında olduğunu nəzərə alsaq, sözügedən dəyişiklik şirkətin yığımlarının ortalama 200 milyon manat itirilməsinə səbəb olacaq. Paralel olaraq yığımların azalması fonunda şirkət müddəti bitən müqavilələr üzrə də ödəniş etməli olacaq. Başqa sözlə, sığorta şirkətinin yığımları azalsa da, ödənişləri eyni templə davam edəcək. Bu isə sığorta şirkətinin maliyyə vəziyyətini bir qədər də çətinləşdirə bilər. 

Qeyd edək ki, “PAŞA Həyat” sığorta 2023-cü ildə 517,5 milyon manat sığorta haqqı toplayıb, bunun 266,2 milyon manatını ödənişə yönəldib. Bu ilin ilk 10 ayında isə həyat sığorta şirkəti 500,17 milyon manat yığım qarşılığında 356,2 milyon manat (nisbət 71%) ödəniş edib. “PAŞA Həyat”ın bir ayda ortalam 38 milyon manat yığım əldə etdiyini nəzərə alsaq, 2024-cü il üzrə şirkətin yığımlarının 580 milyon manata yüksələcəyi gözlənilir.

Pünhan