Mark Zukerberqin yeni hədəfi bəlli oldu: Süni super zəka

"Meta" şirkətinin baş direktoru Mark Zukerberq insan zəkasını aşacaq səviyyədə süni super zəka yaratmaq məqsədilə xüsusi super intellekt komandası qurur. 

Valyuta.az xəbər verir ki, bu iddialı layihənin təfərrüatları və Zukerberqin şəxsi işəqəbul strategiyaları artıq üzə çıxıb.

"Bloomberg" və "The New York Times"ın xəbərinə görə, Zukerberq süni super zəkaya çatmaq üçün yeni bir komanda formalaşdırıb və bu komandaya seçiləcək mütəxəssisləri şəxsən özü işə götürür. O, potensial namizədləri "İşəqəbul partiyası" adını verdiyi "WhatsApp" qrupunda şirkətin digər yüksək vəzifəli rəhbərləri ilə birlikdə müzakirə edir.

Məlumata əsasən, Zukerberqin şəxsi işəqəbul siyahısında süni intellekt tədqiqatçıları, infrastruktur mühəndisləri və texnologiya sahibkarları yer alır. Son bir ay ərzində bu şəxsləri Kaliforniyadakı evinə nahar və şam yeməklərinə dəvət edərək komandaya qatılmalarını təmin etməyə çalışıb.

Süni ümumi zəka ilə süni super zəka arasındakı fərq

Hazırda süni intellekt sahəsində fəaliyyət göstərən şirkətlərin əsas hədəfi süni ümumi zəka (AGI) - yəni insan səviyyəsində düşünə və insanların yerinə yetirdiyi bütün vəzifələri yerinə yetirə bilən maşınlar yaratmaqdır. Süni super zəka isə bu mərhələnin də ötəsinə keçmək deməkdir. Belə bir sistemin insan zəkasından qat-qat üstün intellektual imkanlara sahib olması gözlənilir.

"The New York Times"ın yazdığına görə, Zukerberq süni intellekt startapı olan "Scale AI" şirkətinin təsisçisi Aleksandr Vanqı artıq komandaya cəlb edib. "Meta", süni intellekt modellərini təlim etdirmək üçün digər AI şirkətlərinə məlumat təmin edən bu şirkətə milyardlarla dollar sərmayə qoymağı planlaşdırır. Razılaşma "Scale" şirkətinin digər əməkdaşlarının da "Meta"ya keçməsini nəzərdə tutur, lakin həmin şəxslərin yeni komandaya daxil olub-olmadığı hələlik bəlli deyil.

Bundan əlavə, "Meta" "Google" və "OpenAI" kimi şirkətlərdən onlarla süni intellekt mütəxəssisinə yeddi və ya doqquz rəqəmli yüksək maaş paketləri təklif edib. "New York Times"ın məlumatına görə, bəzi mütəxəssislər artıq bu təklifləri qəbul edib. Zukerberq potensial namizədlərlə keçirdiyi işəqəbul görüşlərində bildirib ki, onun şirkəti süni intellekt inkişafını maliyyələşdirməyə qadirdir və bu, reklam sahəsində on milyardlarla dollarlıq xərclərə səbəb olsa belə, problem yaratmayacaq. Bu isə ilkin maliyyə cəlb etmək məcburiyyətində olan rəqibləri ilə müqayisədə "Meta"ya əhəmiyyətli üstünlük qazandırır.

Paşa Məmmədli