"WhatsApp"da "Instagram" və "Facebook" istifadəçi adlarından istifadə etmək mümkün olacaq

"Meta" "WhatsApp"da telefon nömrəsi əvəzinə istifadəçi adı (username) ilə ünsiyyət qurmağa imkan verən yeni funksiyanı təqdim edib.

Valyuta.az xəbər verir ki, qarşıdakı aylarda mərhələli şəkildə istifadəyə veriləcək yenilik sayəsində istifadəçilər yeni şəxslərlə söhbətə başlayarkən telefon nömrələrini deyil, istifadəçi adlarını paylaşa biləcəklər. İstifadəçi adı rezervasiya prosesi isə artıq başlayıb.

Şirkətin məlumatına görə, bu funksiya xüsusilə tanımadığı şəxslərlə ünsiyyət quran və qrup söhbətlərində iştirak edən istifadəçilərin məxfiliyini artıracaq. İstifadəçi adı aktivləşdirildikdən sonra ilk dəfə əlaqə saxlanılan şəxs və ya biznes hesabı istifadəçinin telefon nömrəsini görməyəcək.

"Meta" bildirib ki, "WhatsApp"da istifadəçi adlarının açıq axtarış kataloqu olmayacaq. Hər hansı istifadəçi ilə əlaqə saxlamaq üçün onun tam istifadəçi adını bilmək lazım gələcək.

Bundan əlavə, məzmun istehsalçıları, kiçik bizneslər və brendlər mövcud "Instagram" və ya "Facebook" istifadəçi adlarını "WhatsApp"da da istifadə edə biləcəklər. Yeni funksiyanın yaxın aylarda bütün istifadəçilər üçün mərhələli şəkildə istifadəyə verilməsi planlaşdırılır.

Sərvanə Rəmixanova