Uorren Baffetin 200 milyard dollarlıq investisiya “səhvi” necə böyük uğura çevrildi

Böyük investor Uorren Baffet hər zaman “başqalarının səhvlərindən öyrənmək, öz səhvlərini etməkdən daha yaxşıdır” prinsipini vurğulasa da, “Berkshire Hathaway” şirkətinin həmtəsisçisi, sədri və baş direktoru illər ərzində kifayət qədər maliyyə səhvləri ilə üzləşib.

Hazırda 94 yaşı olan Baffet səhvlərini qəbul edərkən daim təvazökar və realist davranıb — “Waumbec Mills” və “Dexter Shoe” şirkətlərinin alınması, “Google” və “Amazon”a investisiya etməməsi kimi — lakin o, 2010-cu ildə CNBC kanalından Bekki Kuika verdiyi müsahibədə “alınmış ən axmaq səhmi” barədə danışanda bu, “Omaxanın kahini”nin izləyicilərini təəccübləndirə bilərdi.

Həmin müsahibədə Baffet keçmişdə uğursuz tekstil şirkəti olan “Berkshire Hathaway”in səhmlərini almağa necə başladığını və nəhayət onun nəzarətini ələ keçirdiyini xatırladıb. O, bu şirkəti dünyanın ən böyük holdinqlərindən birinə çevirsə də, tanımadığı bir sahəyə “lövbər salmağı” böyük səhv adlandırıb.

200 milyard dollarlıq səhv?

Uorren Baffet artıq uğurlu bir investor karyerasının başlanğıcında idi ki, 1962-ci ildə “Berkshire Hathaway”in ucuz səhmlərini almağa başladı. Məqsədi həmin dövrdə tekstil fabriklərini bağlamağa hazırlaşan şirkətin səhmlərini ucuz alıb sonradan daha yüksək qiymətə satmaq idi.

1964-cü ildə o, şirkətin sahibi Sibir Stentona səhmlərini hər birini 11.50 dollara satmağı qəbul etdi. Lakin sonradan aldığı məktubda bu məbləğin 11 3/8 dollar (təxminən 11.375 dollar) olduğu göründü. Özünü aldatılmış hiss edən Baffet səhmləri satmaq əvəzinə daha çox səhmdar oldu, şirkəti ələ keçirdi və Stentonu işdən çıxardı.

Uzun illər tekstil sahəsindəki bu sərmayəni böyütməyə çalışdıqdan sonra Baffet etiraf etdi ki, bu qərar ona həmin dövrdə təxminən 200 milyard dollara başa gəlib.

“Əslində mən artıq böyük miqdarda vəsaiti dəhşətli bir biznesə yatırmışdım”, – deyə o, müsahibəsində bildirib. Əgər 1964-cü ildə səhmlərini satsaydı və illərlə “Berkshire”in gəlir gətirmədiyini izləmək əvəzinə həmin vəsaiti sığorta sektoruna yatırtsaydı, bu onun üçün daha uğurlu olardı. Çünki məhz sığorta sektoru 1967-ci ildən etibarən “Berkshire”in böyüməsində əsas rol oynayıb.

Tənzilə Ağabalayeva