“Unibank”ın faiz xərcləri 23 milyon manatdan çox artıb

2025-ci ilin IV rübündə “Unibank”ın ticarət və investisiya qiymətli kağızları üzrə faiz gəlirləri 3 milyon 738 min manat təşkil edib.

Valyuta.az xəbər verir ki, bu göstərici 2024-cü ilin eyni dövrü ilə müqayisədə 953 min manat və ya 20,31% azdır.

Hesabat dövründə bank müştərilərə depozitlər üzrə 75 milyon 814 min manat faiz ödəyib. Bu məbləğ 2024-cü illə müqayisədə 12 milyon 840 min manat və ya 20,39% çoxdur. Cəlb edilmiş kreditlərə görə ödənilən faizlər də artaraq 10 milyon 363 min manatdan 19 milyon 929 min manata çatıb.

Depozitlərin ümumi həcmi 1 milyard 377 milyon 937 min manat olub. Bunun 1 milyard 89 milyon 67 min manatı fiziki şəxslərin, 288 milyon 870 min manatı isə hüquqi şəxslərin depozitlərinin payına düşür.

Müvafiq olaraq, bu göstəricilər 132 milyon 638 min manat və ya 13,87%, 40 milyon 639 min manat və ya 16,38% artım göstərib.

2025-ci ilin hesabat dövründə “Unibank” 25 milyon 781 min manat xalis mənfəət əldə edib. Bu da əvvəlki ilin yanvar-dekabr ayları ilə müqayisədə 26,4% çoxdur.

Bankın ümumi faiz xərcləri 30,45% və ya 23 milyon 785 min manat artaraq 101 milyon 921 min manata çatıb. Qeyri-faiz xərcləri isə 5,7% artaraq 219 milyon 462 min manat təşkil edib.

Mayya Hüseynova