Ukraynadakı müharibənin bitməsi fonunda kriptovalyutalar bahalaşır

2025-ci ilin son həftəsində kriptovalyuta bazarında müsbət dinamika müşahidə olunur.

Valyuta.az xəbər verir ki, gecə saatlarında başlayan artım səhər də davam edib, "Bitcoin" 90 min dollar həddini keçib, "Ether" isə 3 min dollardan yuxarı qalxıb.

Kripto aktivlərindəki bu yüksəliş ABŞ Prezidenti Donald Tramp ilə Ukrayna Prezidenti Volodimir Zelenski arasında baş tutan görüşdən sonra bazarlarda yaranan nikbinlik fonunda qeydə alınıb. Görüş zamanı tərəflərin Ukraynadakı müharibənin bitməsi istiqamətində 90% razılıq əldə etdiklərini açıqlamaları investorların risk iştahasını artırıb. Tramp həmçinin bundan öncə Rusiya Prezidenti Vladimir Putinlə telefon danışığı apardığını bildirib.

Qiymətli metallarda da artım sürətlənib

Kriptovalyutalarla paralel olaraq qiymətli metallar bazarında da hərəkətlilik davam edir. Gümüş gecə saatlarında 83 dollara qədər yüksəlsə də, səhər 79 dollara geri çəkilib. Qızıl isə hazırda 4 510 dollar səviyyəsində ticarət olunur.

Qeyd edək ki, "Bitcoin"in qiyməti bu ilin dekabr ayının 27-si etibarilə, 87,382 ABŞ dolları səviyyəsində qərarlaşıb.

Sərvanə Rəmixanova