"Kapital Bank"ın kredit portfeli 5 milyard manatı ötüb

“Kapital Bank” 2025-ci ilin dördüncü rübünə dair maliyyə nəticələrini açıqlayıb.

Valyuta.Az bankın maliyyə hesabatına istinadən xəbər verir ki, kredit portfelindəki əsas göstəricilərdə ötən ilin eyni dövrü ilə müqayisədə artım müşahidə olunub.

2025-ci ilin IV rübündə bankın müştərilərinə verdiyi ümumi kreditlərin həcmi 5 milyard 419 milyon 985 min manat təşkil edib. Bu, 2024-cü ilin eyni dövrü ilə müqayisədə 208 milyon 778 min manatlıq və ya 4% artım deməkdir. Həmin dövrdə ümumi kredit portfeli 5 milyard 211 milyon 207 min manat olub.

Artım əsasən istehlak kreditlərində olub. Bu katoqoriya üzrə kreditlər artaraq 3 milyard 135 milyon 750 min manata çatıb. 2024-cü ilin IV rübündə bu göstərici 2 milyard 939 milyon 440 min manat idi. Beləliklə, illik artım 196 milyon 310 min manat və ya 6,67% olub.

Biznes kreditləri də artaraq 1 milyard 693 milyon 248 min manat təşkil edib. Bu, 2024-cü ilin eyni dövrü ilə müqayisədə 26 milyon 790 min manat və ya1,6% çoxdur. Həmin dövrdə biznes kreditlərinin həcmi 1 milyard 666 milyon 458 min manat idi.

Xalis kreditlərin ümumi həcmi isə 2025-ci ilin yanvar-dekabr aylarında 4 milyard 765 milyon 83 min manat olub. 2024-cü ilin IV rübünün 4 milyard 620 milyon 255 min manatı ilə müqayisədə 144 milyon 828 min manat və ya 3,13% artımdır.

Tənzilə Ağabalayeva