Süni intellekt startapı 500 milyon dollar investisiya alıb

Süni intellekt sahəsində fəaliyyət göstərən “MatX” 500 milyon dollarlıq B seriyası investisiya turunu uğurla başa çatdırıb. 

Valyutaa.z xəbər verir ki, şirkətin açıqlamasına görə, cəlb olunan vəsait çiplərin “TSMC” ilə birgə istehsalına və 2027-ci ildən etibarən tədarükünə başlanması planlaşdırılan süni intellekt prosessorlarının hazırlanması və istehsal proseslərinin sürətləndirilməsinə yönəldiləcək.

“MatX” 2023-cü ildə Rayner Pop (Reiner Pope) və Mayk Ganter (Mike Gunter) tərəfindən təsis edilib. Şirkət süni intellekt modellərinin öyrədilməsi və işlədilməsi üçün xüsusi olaraq hazırlanmış yüksək məhsuldarlıqlı çiplər inkişaf etdirən texnologiya şirkəti kimi fəaliyyət göstərir. “MatX” xüsusilə böyük dil modelləri (LLM) kimi yüksək hesablama gücü tələb edən tətbiqlərin daha sürətli və səmərəli işləməsini hədəfləyir.

Hazırda bu sahədə əsasən “Nvidia” şirkətinin GPU-larından istifadə olunur. “MatX” isə öz çiplərini inkişaf etdirərək mövcud həllərlə müqayisədə öyrətmə və nəticə çıxarma proseslərində 10 dəfəyədək daha yüksək performans təqdim etməyi planlaşdırır. Şirkət bildirir ki, bu yanaşma süni intellekt modellərinin təlim müddətinin qısalmasına, xərclərin azalmasına və məlumat mərkəzlərində enerji səmərəliliyinin artmasına imkan verəcək.

Şirkətin təsisçiləri daha əvvəl “Google”un “TPU” layihələrində qazandıqları təcrübəyə əsaslanaraq süni intellektə yönəlmiş xüsusi prosessorlar hazırlayırlar. Bu çiplər ənənəvi qrafik prosessorlardan fərqli olaraq birbaşa süni intellekt hesablamalarına fokuslanır.

Mayya Hüseynova