"SpaceX" 30 milyard dollardan çox İPO keçirmək istəyir

Amerikanın “SpaceX” şirkəti 30 milyard dollardan artıq məbləğdə ilkin səhmlərin yerləşdirilməsi - İPO həyata keçirmək niyyətindədir və bu, rekord göstərici ola bilər. 

Valyuta.az xəbər verir ki, bu barədə məlumatı “Bloomberg” mənbələrə istinadən yayıb. 

Bildirilir ki, şirkət öz dəyərini 1,5 trilyon dollar həcmində qiymətləndirməyi planlaşdırır.

Agentliyin məlumatına görə, “SpaceX” rəhbərliyi və məsləhətçiləri şirkəti 2026-cı ilin ortası–sonu aralığında birjaya çıxarmağı hədəfləyir. Mənbələrdən biri bildirib ki, İPO tarixi “bazar konyunkturası və digər amillərdən” asılı olaraq dəyişə və hətta 2027-ci ilə keçirilə bilər.

“Bloomberg”in iki mənbəsinin sözlərinə görə, “SpaceX” cəlb ediləcək vəsaitin bir hissəsini kosmosda data-mərkəzlərin yaradılmasına yönəltməyi planlaşdırır, o cümlədən bunun üçün tələb olunan çiplərin alınması nəzərdə tutulur. Şirkətin gəlirlərinin 2025-ci ildə təxminən 15 milyard dollar, 2026-cı ildə isə 22–24 milyard dollar olacağı gözlənilir. Mənfəətin əsas hissəsini “Starlink” peyk rabitəsi təmin edir.

“SpaceX” 2002-ci ildə təsis olunub, lakin indiyədək birjada səhmlərini yerləşdirməyib. Şirkət kommersiya peyk operatorları və “NASA” daxil olmaqla dövlət agentliklərinin missiyalarını yerinə yetirir. Ötən həftə ABŞ mediası şirkətin investorlarına 2026-cı ilin ikinci yarısında mümkün İPO barədə məlumat verdiyini yazmışdı.

Paşa Məmmədli