Sakit okeanın rekord dərinliklərində nadir torpaq metalları tapıldı

Yaponiya Sakit okeanda rekord dərinliklərdə nadir torpaq metalları aşkar etdiyini açıqlayıb. 

Valyuta.az xəbər verir ki, JAMSTEC missiyası dünyada dərin dəniz nadir torpaq resurslarının çıxarılmasına yönəlmiş ilk cəhd kimi qiymətləndirilir. Bu barədə “Al Jazeera” yazıb.

Bazar ertəsi Yaponiya hökuməti bildirib ki, Sakit okeanda həyata keçirilən dərin dəniz sınaq missiyası çərçivəsində 6000 metr dərinlikdə nadir torpaq elementləri ehtiva edən çöküntü süxurları aşkarlanıb. Tokio qiymətli minerallar üzrə Çindən asılılığını azaltmaq məqsədilə dərin dəniz yataqlarının işlənməsi istiqamətində səylərini gücləndirib.

Hökumət sözçüsü Key Sato bildirib ki, Yaponiya Dəniz və Yer Elmləri və Texnologiyaları Agentliyi (“JAMSTEC”) tərəfindən çıxarılan nümunə çöküntüdəki nadir torpaq elementlərinin miqdarının müəyyən edilməsi üçün analiz olunur. Onun sözlərinə görə, çöküntünün çıxarılması həm iqtisadi təhlükəsizlik, həm də dəniz mühitinin hərtərəfli inkişafı baxımından “əhəmiyyətli nailiyyət”dir.

Keçən ay dərin dəniz elmi qazma gəmisi uzaq Sakit okean adası Minami-Torişimaya yollanıb. Hesab olunur ki, adanın ətraf sularında qiymətli mineralların zəngin ehtiyatları mövcuddur. Yaponiya iqtisadi zonasında yerləşən ada ətrafındakı ərazidə 16 milyon tondan artıq nadir torpaq elementi ehtiyatının olduğu təxmin edilir ki, bu da dünyada üçüncü ən böyük göstəricidir.

Ötən ilin sonunda Yaponiya və ABŞ nadir torpaq elementlərinin tədarükünün təmin edilməsi üzrə fəaliyyətlərin əlaqələndirilməsinə dair saziş imzalayıb. Hər iki ölkə Çinin mühüm mineralların qlobal ehtiyatlarının böyük hissəsinə nəzarət etməsinə diqqət yetirir.

Xüsusilə Yaponiya dünyada nadir torpaq elementlərinin ən böyük təchizatçısı olan Çinin gərgin diplomatik münasibətlər səbəbilə ixracı məhdudlaşdıra biləcəyindən narahatdır. Bu, nadir torpaq elementlərinin təxminən 70 faizini Çindən idxal edən Tokioda ciddi narahatlıq doğurur.

Qeyd edək ki, nadir torpaq elementləri yer qabığından çıxarılması çətin olan 17 metaldan ibarətdir və elektromobillərdən tutmuş sərt disklərə, külək turbinlərinə və raketlərə qədər geniş sahədə istifadə olunur.

Paşa Məmmədli