"Intel" "Nvidia"nın bazarına girir: GPU təşəbbüsü ilə tarazlıqlar dəyişə bilər

"Intel" son dövrdə özünü yenidən mövqeləndirməyə çalışarkən, baş direktor Lip Bu Tan şirkətin qlobal səviyyədə "Nvidia"nı zirvəyə daşıyan çip növünə yönələcəyini açıqlayıb. 

Valyuta.az xəbər verir ki, bu addım şirkətin indiyə qədərki strategiyasında diqqət çəkən bir dönüş nöqtəsini işarə edir.

Cümə axşamı keçirilən "Cisco AI Summit" tədbirində çıxış edən Lip Bu Tan "Intel"in qrafik emal vahidləri (GPU) istehsalına başlayacağını açıqlayıb. "Intel"in ənənəvi olaraq istehsal etdiyi CPU-lara nisbətən daha ixtisaslaşmış bu emalçılar həm oyun dünyasında, həm də süni intellekt modellərinin təlimi kimi yüksək hesablama gücü tələb edən sahələrdə geniş istifadə olunur.

GPU təşəbbüsü "Intel"in məlumat mərkəzi qrupunun rəhbəri, vitse-prezident və baş menecer Kevork Keçiçian tərəfindən idarə olunacaq. Keçiçian keçən ilin sentyabr ayında mühəndislik yönümlü yeni işə qəbul çərçivəsində "Intel"ə qoşulmuşdu.

Şirkət bu çərçivədə yanvar ayında daha bir əhəmiyyətli ismi komandaya əlavə edib. Uzun illər "Qualcomm" şirkətində çalışan və son olaraq mühəndislik üzrə vitse-prezident vəzifəsini icra edən Erik Demers "Intel"in GPU layihələri üçün transfer edilib.

Bu təşəbbüs hələ ilkin mərhələdədir. Tan bildirib ki, Intel-in bu sahədəki strategiyası birbaşa müştəri tələbləri və ehtiyacları əsasında formalaşdırılacaq.

Hərçənd GPU-nu ilk icad edən firma olmasa da, bu çip növü "Nvidia"nın bugünkü uğurunda mərkəzi rol oynayıb. Xüsusilə süni zəka sistemləri üçün hazırladığı GPU-ların texniki üstünlükləri və yüksək tələbatı "Nvidia"ya bazarda açıq fərqlə liderlik qazandırıb.

Bu səbəbdən "Intel"in məhz bu dövrdə GPU sahəsinə yönəlməsi diqqət çəkir. Tan keçən il mart ayında baş direktor vəzifəsinə gələndə şirkətin daha sadə bir struktura sahib olacağını və əsas iş sahələrinə fokuslanacağını bildirmişdi. GPU-lar nəticə etibarilə yarımkeçirici olsa da, bu addım "Intel" üçün əhəmiyyətli bir genişlənmə deməkdir.

Paşa Məmmədli