Sadə ideyadan yaranan milyard dollarlıq biznes

ABŞ-lı gənc sahibkar Adam Guild yaratdığı "Owner.com" platforması ilə restoran sahiblərinə rəqəmsal azadlıq qazandırmaq üçün uğurlu bir model qurub. Onun məqsədi sadəcə onlayn sifariş sistemləri yaratmaq deyil, bu sahədəki sahibkarları yüksək komissiyalı tətbiqlərdən və texnoloji asılılıqdan azad etmək olub. Gənc yaşda böyük təsir gücünə malik texnoloji həll təklif edən Guild bu yanaşması ilə restoran sektorunda fərqlənməyi bacarıb.

Valyuta.az xəbər verir ki, ideya sadə, amma güclü bir müşahidədən yaranıb.

Adam Guild anasının kiçik biznesində, konkret olaraq bir heyvan baxım salonunda yaşadığı təcrübədən ilham alıb. Anası onlayn görünürlük və müştəri axını baxımından çətinliklərlə üzləşirdi. Guild ona lokal SEO və veb dəstək göstərməklə satışların qısa müddətdə artdığını görüb. Bu vəziyyət göstərib ki, rəqəmsal vasitələrə çıxış mikro bizneslər üçün real üstünlük yarada bilər. Guild bu anlayışı restoran sektoruna tətbiq etmək qərarına gəlib.

2020-ci ildə təsis edilən "Owner.com" platforması restoranlara öz brendləri altında fəaliyyət göstərmək, sifarişlərini komissiyasız şəkildə qəbul etmək və müştəri məlumatlarını birbaşa öz sistemlərində saxlamaq imkanı verir. Burada təkcə veb sayt və mobil tətbiqlərin yaradılması deyil, eyni zamanda marketinq avtomatlaşdırması, müştəri loyallığı sistemləri və analitik xidmətlər də təqdim olunur. Beləliklə, restoran sahibləri rəqəmsal kanalları birbaşa öz bizneslərinin xidmətinə verə bilirlər.

"Owner.com" qısa müddətdə bazarda böyük maraq doğurub. 2025-ci ildə şirkət Series C investisiya raundunda 120 milyon dollar sərmayə cəlb edib və dəyəri 1 milyard dolları keçərək “unicorn” statusuna yüksəlib. Platforma bu gün 10 minə yaxın restoran tərəfindən istifadə olunur və sahibkarlara satış, marketinq və müştəri münasibətləri sahəsində effektiv alətlər təqdim edir.

Adam Guild isə bu uğurlarına görə beynəlxalq səviyyədə tanınıb. "Forbes"in “30 Under 30” texnologiya siyahısında yer alıb və eyni zamanda "Thiel Fellowship" proqramına seçilib. Bu proqram, universitetdən kənarda innovativ ideya üzərində çalışan gəncləri dəstəkləmək üçün yaradılıb və yalnız məhdud sayda iştirakçını qəbul edir.

Gənc yaşda qurduğu biznes modeli ilə Adam Guild restoran sektoruna həm texnoloji yenilik, həm də iqtisadi sərbəstlik gətirməyi bacarıb. "Owner.com" yalnız texnologiya platforması deyil, restoranların rəqəmsal dövrdə özlərini qoruyub inkişaf etdirməsi üçün güclü bir vasitəyə çevrilib. Bu yanaşma, kiçik sahibkarların gələcəkdə daha çevik, dayanıqlı və azad fəaliyyət göstərməsinə şərait yaradır.

Mayya Hüseynova