2026-cı ildə bu ölkələrə səyahət bahalaşacaq - SƏBƏB

2026-cı ildən etibarən dünyanın bir sıra məşhur səyahət istiqamətlərində turist vergilərinin artırılması və ya yeni ödənişlərin tətbiqi gözlənilir. Bu isə həmin ölkələrə səfərlərin əvvəlki illə müqayisədə daha baha başa gəlməsinə səbəb olacaq.
Turizm vergiləri bir çox hallarda, yəni həddindən artıq turist axınının qarşısını almaq və ya yerli infrastrukturun maliyyələşdirilməsi məqsədi daşıyır. Bu ödənişlər bəzən şəhərə giriş səviyyəsində tətbiq olunur, bəzən isə hotellərdə gecələmə haqqına əlavə olunur. Məsələn, Yeni Zelandiya bu vergilər hesabına təbiəti qoruma proqramlarını maliyyələşdirir.

2026-cı ildə hansı istiqamətlər daha bahalı olacaq?

Edinburq (Şotlandiya) – otellərə 5% əlavə vergi

Edinburq 2024-cü ilin iyulundan başlayaraq turizm vergisi tətbiq edən Şotlandiyanın ilk şəhəri olacaq. Şəhərə səfər edən turistlər ilk 5 gecə üçün otel qiymətinə əlavə olaraq 5% vergi ödəyəcəklər.
Şəhər Şurası bildirib ki, bu gəlirlər 2029-cu ilə qədər ildə təxminən 50 milyon funt sterlinq (təqribən 67 milyon dollar) təşkil edəcək və infrastrukturun yaxşılaşdırılması, turizm idarəçiliyi və mədəni irsin qorunmasına yönəldiləcək.

Kioto (Yaponiya) – gecələmə vergiləri artırılır

Yaponiyanın qədim məbədləri və sakura mövsümü ilə məşhur olan Kioto şəhərində 2026-cı ilin martından etibarən yeni tarif cədvəli qüvvəyə minir.
Vergi məbləğləri yerləşmə qiymətindən asılı olaraq dəyişəcək: Yeni vergi Kioto büdcəsinə ildə 12,6 milyard yen (təqribən $81 milyon) vəsait gətirəcək.

Barselona (İspaniya) – 5 ulduzlu otellərdə vergi ikiqat artır

Barselona son illər xüsusilə yay aylarında turist sıxlığı və artan yaşam xərcləri səbəbilə sosial narazılıqların şahidi olur. Bölgədə hazırda lüks otel və rezidensiyalarda gecə üçün ödənilən 3,50 avro regional turizm vergisi 7 avroya qaldırılacaq.
Bu qərar əvvəlcə 2025-ci il üçün nəzərdə tutulsa da, tətbiq ən tez 2026-cı ilin aprelinə təxirə salınıb.

Tailand – ölkəyə giriş üçün 300 baht (≈ $10) rüsum

Tailand kabineti havayolu ilə gələn turistlər üçün 300 baht (≈ $10), quru və ya dəniz yolu ilə gələnlər üçün isə 150 baht giriş rüsumunu təsdiqləyib.
Turist axınının 2025-ci ildə zəif olması səbəbilə tətbiq gecikdirilib və EuroNews-un məlumatına görə ödəniş 2026-nın ortalarında qüvvəyə minəcək.

Norveç – 3% turizm vergisi

Norveç hökuməti 2026-cı ildən etibarən bələdiyyələrə turizm vergisi tətbiq etmək səlahiyyəti verib. Vergi gecələmə və kruiz səfərlərinə 3% əlavə şəklində hesablanacaq.
Vergi avtomatik olaraq bütün ölkədə keçərli deyil – yalnız müraciət edən şəhərlər tətbiq edə bilər. Lofoten və Tromsø kimi Şimali işıqları (Aurora Borealis) ilə məşhur olan bölgələr artıq sistemə qoşulduqlarını təsdiqləyiblər.
Qeyd edək ki, Norveç 2025-ci ildə turizmdə rekorda imza atıb - yalnız iyun-avqust aylarında ölkə 17,7 milyon gecələmə qəbul edib.

Sərvanə Rəmixanova