"OpenAI" "iPhone"un baş dizaynerinin şirkətini 6,5 milyarda satın aldı

"OpenAI" şirkəti "iPhone"un sabiq baş dizayneri Conni Ayvin yaratdığı "İo" adlı startapı 6,5 milyard dollar dəyərində satın aldığını elan edib. 

Valyuta.az xəbər verir ki, bu barədə məlumat şirkətin rəsmi saytında yerləşdirilib.

Ayv ilə "OpenAI"nin baş direktoru Sem Altman arasında mümkün əməkdaşlıq barədə danışıqlar hələ 2023-cü ildən aparılırdı, lakin razılaşma yalnız bu yaxınlarda əldə olunub. Müqaviləyə əsasən, 5 milyard dollar ödəniş "OpenAI" səhmləri ilə həyata keçiriləcək və alqı-satqı prosesinin 2025-ci ilin yayında tamamlanması gözlənilir.

Məlumata görə, "İo" komandası ChatGPT bazasında yeni cihaz üzərində çalışır. Bu cihaz nə smartfonu, nə də noutbuku əvəz edəcək, əksinə, "tamamilə yeni bir şey" olacaq. 

Altmanın sözlərinə görə, bu cihaz 2026-cı ildə təqdim ediləcək və "Humane Pin" və ya "Rabbit R1" kimi uğursuz süni intellekt cihazlarına bənzəməyəcək.

Qeyd olunur ki, Ayvın komandasından 55 mühəndis "OpenAI"yə keçəcək. Lakin Ayv özü özünün "LoveFrom" adlı dizayn studiyasının müstəqilliyini qoruyacaq və birbaşa "OpenAI"də çalışmayacaq. Bununla belə, "LoveFrom" şirkəti "OpenAI"nin bütün məhsul xəttinin – həm cihazların, həm də ChatGPT kimi proqram təminatının dizaynı ilə məşğul olacaq.

1992-2019-cu illər arasında "Apple"da çalışmış Conni Ayv şirkətin ən simvolik məhsullarının - "iMac", "iPod", "iPhone", "iPad", iOS və "macOS" sistemlərinin dizaynında həlledici rol oynamışdı. O, "Apple"dan ayrıldıqdan sonra "LoveFrom" studiyasını qurmuşdu.

Paşa Məmmədli