"Goldman Sachs" 2025-ci il üçün qlobal makro proqnozlarını açıqladı

Amerikan investisiya bankı "Goldman Sachs" ABŞ, Avrozona və Çin arasında fərqli iqtisadi artım yollarını proqnozlaşdıraraq, ABŞ-nin inkişaf etmiş bazarlardakı rəqiblərindən daha yaxşı performans göstərəcəyini bildirib.  

Valyuta.Az həmin proqnozları təqdim edir:

1. Qlobal ÜDM artımı

"Goldman Sachs" 2025-ci ildə real qlobal ÜDM-in illik 2,7% səviyyəsində artacağını proqnozlaşdırır. Bu artım artan real ailə gəlirləri və yumşalan maliyyə şərtləri ilə dəstəklənəcək.  

Hesabata görə, faiz dərəcələrinin endirilməsi qlobal iqtisadi artımda mühüm rol oynayacaq. ABŞ-nin inkişaf etmiş bazarlardakı rəqibləri ilə müqayisədə daha güclü məhsuldarlıq artımı göstərərək onları geridə qoyacağı bildirilir. İnkişaf etmiş bazarlarda əsas inflyasiyanın 2025-ci ilin sonuna qədər hədəf səviyyəsinə enəcəyi gözlənilir.  

2. ABŞ iqtisadi perspektivi

"Goldman Sachs" ABŞ-da ÜDM artımının 2025-ci ildə 2,4% səviyyəsində olacağını proqnozlaşdırır. Bu, güclü gəlir artımı və maliyyə yumşalması ilə əlaqələndirilir. Əsas şəxsi istehlak xərcləri inflyasiyasının ilin sonuna qədər 2,4%-ə düşəcəyi gözlənilir.  

Bununla yanaşı, işsizlik səviyyəsinin 2025-ci ilin sonunda 4%-ə enəcəyi təxmin edilir.  

3. "Fed" siyasəti

"Goldman Sachs" ABŞ Federal Ehtiyat Sisteminin ("Fed") 2025-ci ildə üç dəfə faiz endirimi həyata keçirəcəyini proqnozlaşdırır. İlk 25 baza bəndlik endirim mart ayında, növbətisi iyunda və sonuncusu sentyabrda baş verəcək. Bu endirimlərin nəticəsində faiz dərəcəsinin 3,5-3,75% intervalında olması gözlənilir. "Fed"in balans azaldılmasını isə ilin ikinci rübündə başa çatdıracağı bildirilir.  

4. Avrozona iqtisadi artımı

"Goldman Sachs" Avrozona üçün ÜDM artımının 2025-ci ildə 0,8% səviyyəsində olacağını proqnozlaşdırır. Zəif artım yüksək enerji qiymətləri və Çinlə rəqabətin təsiri altında zəifləyəcək. Maliyyə sərtliyi və ticarət siyasətindəki qeyri-müəyyənliklərin artıma mənfi təsir göstərəcəyi qeyd olunur. İnflyasiyanın isə ilin sonuna qədər 2%-ə enəcəyi gözlənilir.  

5. "ECB" siyasəti

Avropa Mərkəzi Bankının ("ECB") iyul ayına qədər faiz dərəcəsini 1,75%-ə endirəcəyi proqnozlaşdırılır. Bununla belə, "Goldman Sachs" daha zəif iqtisadi artım və inflyasiya şəraitində daha sürətli və dərin endirimlərin zəruri ola biləcəyi ilə bağlı xəbərdarlıq edir.  

6. Çin iqtisadi yavaşlaması

Çində 2025-ci ildə real ÜDM artımının 4,5%-ə enəcəyi gözlənilir. Buna zəif daxili istehlak, daşınmaz əmlak bazarındakı çətinliklər və ABŞ-ın tətbiq etdiyi yüksək tariflər səbəb olacaq.  

Uzunmüddətli perspektivdə Çinin demoqrafik problemləri, borcun azaldılması və qlobal tədarük zəncirindəki risklər iqtisadi artımını məhdudlaşdıracaq əsas amillər kimi göstərilir.  

7. ABŞ siyasəti və geosiyasi risklər

"Goldman Sachs" investorları ABŞ-da siyasət dəyişikliklərini və qlobal geosiyasi riskləri diqqətlə izləməyə çağırır. Əsas risklər arasında Çinlə bağlı tariflər, miqrasiyanın azalması, vergi endirimləri və tənzimləmə siyasətinin yumşaldılması yer alır.  

Eyni zamanda, Yaxın Şərqdəki vəziyyət, Rusiya-Ukrayna müharibəsi və ABŞ-Çin münasibətlərindən irəli gələn risklər də hesabatda vurğulanır.  

Rəhim