Qlobal səhmlər FED-in dekabr faiz endirimi gözləntiləri fonunda yüksəldi

Qlobal bazarlar həftəyə müsbət başlayıb. İnvestorların ABŞ Federal Ehtiyat Sisteminin (FED) artıq gələn ay faiz endiriminə gedə biləcəyi yönündə artan gözləntiləri səhmlərin dəyərini yüksəldib. Hazırda treyderlər FED-in dekabrda 25 baza bəndi endirim ehtimalını 60% səviyyəsində qiymətləndirirlər.

Valyuta.az xəbər verir ki, həftə ərzində ABŞ-də pərakəndə satışlar və istehsalçı qiymətləri üzrə yeni statistik məlumatlar açıqlanacaq. Britaniyanın maliyyə naziri Reçel Rives də uzun müddətdir gözlənilən büdcə təqdimatını bu həftə elan edəcək.

Asiya bazarlarında yüksəliş qeydə alınıb.

Yaponiyada bazarların tətil səbəbindən bağlı olduğu gündə Asiya indeksləri müsbət dinamika göstərib.
MSCI Asiya-Sakit Okean indeksi 1% artıb
Cənubi Koreyanın Kospi indeksi 0,15% yüksəlib

ABŞ fyuçersləri də günə artımla başlayıb:
Nasdaq futures - +0,8%
S&P 500 futures - +0,55%
EuroStoxx 50 futures - +0,7%

FED rəsmilərinin açıqlamaları bazara stimul verib

FED-in nüfuzlu rəsmisi Con Uilyams faizlərin “yaxın dövrdə” azala biləcəyini bildirib. Goldman Sachs iqtisadçıları da dekabrda bir faiz endirimi, 2026-cı ilin mart və iyun aylarında isə əlavə yumşalma gözləyirlər.

Bununla belə, ötən həftə texnologiya şirkətlərinin yüksək qiymətləndirilməsinə dair narahatlıqlar əsas ABŞ indekslərini mənfi zonada saxlayıb.

Məlumat çatışmazlığı FED üçün çətinlik yaradır

ABŞ-da bu ay baş vermiş hökumət bağlanması nəticəsində bəzi mühüm iqtisadi məlumatlar toplanmayıb. Əmək Statistika Bürosu oktyabr ayı üzrə istehlak qiymətləri indeksinin dərcini ləğv edib. Bu isə FED-in iqtisadi mənzərəni qiymətləndirməsini çətinləşdirir.

Sərvanə Rəmixanova