Qənaətli həyat üçün 4 məsləhət açıqlanıb

Maliyyə üzrə ekspert Corc Kamel hesab edir ki, ərzaq qiymətlərinin artması və maaşların eyni səviyyədə qalması bir çox insan üçün güclü maliyyə gələcəyi qurmağı çətinləşdirir. O, sadə və izlənilməsi asan addımlar vasitəsilə çoxsaylı insanlara borclarını ödəməyə və sərvət toplamağa kömək edib.

Valyuta.az xəbər verir ki, “Youtube” platformasında yayımlanan bir videoda müəllif və podkast aparıcısı izləyicilərinin qənaətli həyat tərzi ilə bağlı ən çox verilən suallarını cavablandırıb. O, pul yığmaq və daha qənaətli yaşamaq üçün beş əsas tövsiyəni bölüşüb.

Yeməkləri əvvəlcədən hazırlamaq

Qida xərcləri ilə bağlı Kamel büdcəni aşmamaq üçün əvvəlcədən plan qurmağı tövsiyə edir. O, hər həftə müəyyən vaxt ayıraraq yeməkləri əvvəlcədən hazırlamağı məsləhət görür. Qənaətli həyat üzrə ekspert izləyicilərinə mağazada həddindən artıq xərcləməyə meyl etməmək üçün əvvəlcədən nə istədiklərini planlaşdırmağı tövsiyə edib.

Daşınmaz əmlaka nağd vəsaitlə investisiya

Daşınmaz əmlaka investisiya ilə bağlı suala cavab verən Kamel bildirib ki, ən yaxşı seçim bu sahəyə nağd vəsaitlə yatırım etməkdir. O, həmçinin ikinci əmlaka investisiya etməzdən əvvəl əsas yaşayış evinin borcunun tam ödənilməsini tövsiyə edib. Kamel potensial investorları kiçik addımlarla başlamağa çağırıb. Səhm bazarında yatırım etmək istəyənlər üçün isə pensiya hesabı olmayan broker hesablarında indeks fondlarını məsləhət görüb.

“Redfin” şirkətinin ekspertlərinə görə, daşınmaz əmlaka investisiya etmək istəyənlər bir neçə mühüm addımı nəzərə almalıdır. Bunlara peşəkar mütəxəssislərdən ibarət komanda qurmaq, vergiləri hesablamaq və sığorta təminatı əldə etmək daxildir.

Əyləncə üçün də büdcə ayırmaq

Borcsuz həyat tərzinə nail olduqdan sonra pulu necə xərcləmək barədə düşünənlərə Kamel büdcədə əyləncə üçün ayrıca maddə ayırmağı tövsiyə edir. Onun sözlərinə görə, məsələn, istirahət səfəri kimi məqsədlər üçün ayrıca yığım fondu yaratmaq həm qənaət planlarını qorumağa, həm də planlı şəkildə xərcləməyə imkan verir.

Fövqəladə vəziyyətin nə olduğunu müəyyən etmək

Fövqəladə hallar üçün ehtiyat fondu yaratmaq bir məsələdir, lakin onun nə vaxt istifadə olunacağını anlamaq başqa məsələdir. Kamelə görə, hər hansı vəziyyətin fövqəladə sayılması üçün üç şərt olmalıdır: gözlənilməz, zəruri və təcili olması.

O qeyd edib ki, fövqəladə fond “borca düşməmək üçün sığorta kimidir”. Belə hallara gözlənilməz avtomobil təmiri, sığorta ilə qarşılanmayan zəruri tibbi prosedurlar və ya evdə baş verən su və ya boru problemləri kimi vəziyyətlər daxildir.

Tənzilə Ağabalayeva