Niyə bankların regionlarda daimi hüquqşünasları yoxdur?

Bankların regionlarda daimi hüquqşünas saxlamaması artıq geniş yayılmış praktikadır. Bu vəziyyət ilk baxışdan sual doğurur: səbəb nədir?

Məsələ təkcə hüquqi kadrlara olan ehtiyacla deyil, bankların hüquqi işləri hansı formada idarə etməsi ilə də bağlıdır.

Mövzu ilə bağlı Valuta.az-a danışan bank məsələləri üzrə ekspert Əkrəm Həsənov bildirib ki, bəzi bankların regionlardakı filiallarında hüquqşünas çalışır, lakin bu hallar istisnadır:

"Əksər hallarda, nəinki regionlarda, hətta Bakı şəhərindəki filiallarda da hüquqşünas işləmir. Buna səbəb bankların hüquqi məsələlərinin birbaşa olaraq baş ofisdə yerləşən hüquq bölməsi tərəfindən idarə olunmasıdır. Hüquqşünaslar qaydalar hazırlayır, rəylər verir, müqavilələr tərtib edir və bu proseslərin hamısı onlayn qaydada həll olunur. Məhkəmə prosesi olduqda da işə baş ofisdəki hüquqşünaslar çıxış edir. Baş ofisin hüquqşünasları yalnız məhkəməyə çıxmaqla kifayətlənmirlər, eyni zamanda banka gündəlik hüquqi xidmət göstərirlər. Buna görə də filiallarda hüquqşünas saxlamağa ehtiyac qalmır. Regionlarda isə hüquqşünasın əsas ehtiyac yarandığı sahə məhkəmədə təmsilçilik ola bilər. Lakin həmin bölgələrdə məhkəmə işlərinin sayı çox az olduğu üçün bu funksiyanı da baş ofisdən idarə etmək daha məqsədəuyğundur".

Ə.Həsənov qeyd edik ki, bundan əlavə, regionlarda hüquqşünas tapmaq da çətin məsələdir:

"Lazımi bilik və keyfiyyətlərə malik mütəxəssis tapmaq müşkül məsələdir. Paytaxtdan hüquqşünas göndərmək isə bank üçün əlavə xərc deməkdir - yaşayış yeri, nəqliyyat və digər xərclər ortaya çıxır. Hətta yalnız hüquqşünas deyil, bir çox hallarda nə "Bakı", nə də region filiallarında mühasib də işləmir. Bu sahədə də işlər onlayn şəkildə, birbaşa bankın baş ofisi tərəfindən görülür. Beləliklə, bəzi vəzifələrə filiallarda fiziki olaraq ehtiyac qalmır".

Mayya Hüseynova