Nəzər Əliyev: "Lahıcda parkinq ərazisi salınır"

Bu il Dövlət Turizm Agentliyinin Qoruqları İdarəetmə Mərkəzi üçün Qoruq evi inşa olunur, qoruğun qarşısında Tarix-Diyarşünaslıq Muzeyinin yerləşməsi üçün yeni muzey binası tikilir.

Valyuta.az xəbər verir ki, bunu "Lahıc" Dövlət Tarix-Mədəniyyət Qoruğunun direktoru Nəzər Əliyev bildirib.

Onun sözlərinə görə, hazırda tikinti işləri gedir: "Böyük bir sahədə Lahıcda parkinq ərazisi salınır. Hazırda yollar darısqaldır və maşınların çoxluğu ciddi sıxlıq yaradır. Bu səbəbdən parkinq ərazisindən qəsəbəyə çıxmaq üçün xüsusi pilləkan və döşəmələr salınır ki, yerli və xarici turistlərin rahatlığı təmin olunsun.

O bildirib ki, eyni böyük bir abadlıq layihəsinin işlərinə başlanılıb: "Müəyyən qədər işlər görülüb - müəyyən hissədə küçələrin döşəmələrinin bərpası həyata keçirilib.Gələn il də davam etdiriləcək bərpa işləri arasında bütün küçələrin işıqlandırılması sisteminin mərkəzi şəkildə qurulması yer alır".

Onun sözlərinə görə, işıq kabelləri artıq qurulub, yalnız müəyyən az işlər qalıb.

Sərvanə Rəmixanova