Meyvə və tərəvəz ixracında artım - Milyonlarla dollar gəlir əldə edilib

2025-ci ilin ilk iki ayı ərzində ixrac olunan meyvə və tərəvəz məhsullarının miqdar və gəliri açıqlanıb.

Valyuta.az Dövlət Gömrük Komitəsinə istinadən xəbər verir ki, 2025-ci ilin yanvar- fevral ayları üzrə Azərbaycan miqdar ifadəsi ilə 100 min 58 ton meyvə və tərəvəz məhsulları ixrac edib. İxracdan 108 milyon 609 min ABŞ dolları dəyərində gəlir əldə olunub. 

Ötən ilin eyni dövründə isə meyvə və tərəvəz ixracı 87 min 710 ton təşkil edib və 99 milyon 474 min ABŞ dolları dəyərində hesablanıb. Hesablamalara görə illik müqayisədə meyvə və tərəvəz ixracında 12 min 348 ton və ya 9 milyon 135 min ABŞ dolları dəyərində artım müşahidə olunub. 

Qeyd edək ki, son iki ay üçün meyvə və tərəvəz ümumi ixracın 24.61%-ni təşkil edib. Ötən ilin eyni dövründə isə ümumi ixracın faiz payı 24.42% olub ki, bu da ümumi ixrac payında cüzi artım deməkdir.

Sərvanə Rəmixanova