"Meta" “Nebius” ilə 27 milyard dollara qədər dəyəri olan müqavilə imzalayıb

ABŞ-ın texnologiya şirkəti “Meta” Niderlandın bulud texnologiyaları təminatçısı “Nebius” ilə süni intellekt infrastrukturu üzrə uzunmüddətli əməkdaşlıq müqaviləsi imzalayıb.

Valyuta.az xəbər verir ki,  müqavilənin ümumi dəyərinin 27 milyard dollara qədər çatacağı bildirilir.

Şirkətin açıqlamasına görə, razılaşma çərçivəsində “Nebius” növbəti beş il ərzində müxtəlif regionlarda yerləşən data mərkəzləri vasitəsilə “Meta”ya 12 milyard dollar dəyərində xüsusi hesablama gücü təqdim edəcək. Bu infrastruktur çərçivəsində “Nvidia” şirkətinin ən yeni süni intellekt çiplərindən biri olan “Vera Rubin” çiplərinin iri miqyaslı tətbiqlərindən birinin həyata keçirilməsi planlaşdırılır.

Bundan əlavə, “Meta” eyni müddət ərzində “Nebius”dan əlavə hesablama gücü də almağı öhdəsinə götürüb. Bu əlavə resursların dəyərinin ümumilikdə 15 milyard dollara qədər ola biləcəyi qeyd olunur.

“Meta” rəhbərliyi bildirib ki, şirkət təkcə 2026-cı ildə süni intellekt layihələri ilə bağlı kapital xərclərini 135 milyard dollara qədər artırmağı planlaşdırır.

“Nebius”un təsisçisi və baş icraçı direktoru Arkadi Voloj əməkdaşlığı şərh edərək qeyd edib ki, bu razılaşma şirkətin süni intellekt bulud xidmətlərinin genişləndirilməsi strategiyası üçün mühüm addımdır.

“Meta ilə tərəfdaşlığımızı genişləndirməkdən məmnunuq. Bu müqavilə uzunmüddətli və iri həcmli xidmət müqavilələri vasitəsilə əsas süni intellekt bulud biznesimizin inkişafını sürətləndirməyə kömək edəcək”, – deyə Arkadi Voloj bildirib.

Müqavilə barədə xəbərin yayılmasından sonra “Nebius” şirkətinin səhmləri birjadankənar ticarətdə təxminən 14 faiz artım göstərib.

Tənzilə Ağabalayeva