78 yaşında biznes qurub 84 yaşında milyarder olan sahibkar

Amerikalı sahibkar Sidney Frank biznes tarixində gec yaşda uğur qazanan ən məşhur nümunələrdən biri hesab olunur.

Valyuta.az xəbər verir ki, o, uzun illər spirtli içki sektorunda çalışdıqdan sonra 78 yaşında “Grey Goose” premium votka markasını yaradıb, cəmi bir neçə il sonra isə şirkəti milyardlarla dollara sataraq böyük sərvət əldə edib.

Frank 1919-cu ildə ABŞ-da anadan olub və karyerasına içki sənayesində marketinq və satış sahəsində başlayıb. 1970-ci illərdə qurduğu "Sidney Frank Importing Company" vasitəsilə Avropa içkilərini ABŞ bazarına gətirirdi. Onun ilk böyük uğurlarından biri Almaniyanın “Jägermeister” likörünü ABŞ-da populyarlaşdırmaq oldu.

1990-cı illərin ortalarında Frank bazarda maraqlı bir boşluq gördü: premium seqmentdə güclü votka brendi demək olar ki, yox idi. Bu ideya əsasında o, 1997-ci ildə Fransada istehsal olunan “Grey Goose” votkasını yaratdı. Məhsul yüksək qiymət, fərqli dizayn və elit imic strategiyası ilə bazara təqdim edildi və qısa müddətdə ultra-premium votka kateqoriyasının liderlərindən birinə çevrildi.

Markanın sürətli uğuru nəticəsində 2004-cü ildə “Grey Goose” şirkəti “Bacardi” korporasiyasına təxminən 2 milyard dollara satıldı. Bu satış Sidney Frankı 84 yaşında milyarderə çevirdi.

Frank yalnız biznes uğurları ilə deyil, həm də xeyriyyəçilik fəaliyyəti ilə tanınır. O, təhsil sahəsinə, xüsusilə də Brown Universitetinə böyük maliyyə dəstəyi göstərib və tələbələr üçün milyonlarla dollarlıq təqaüd fondları yaradıb.

Sidney Frank 2006-cı ildə 86 yaşında vəfat edib. Onun hekayəsi biznes dünyasında tez-tez bir nümunə kimi göstərilir: sahibkarlıq üçün bəzən ən böyük üstünlük yaş deyil, təcrübə və doğru ideyanı vaxtında görmək bacarığıdır.

Mayya Hüseynova