Mərkəzi Bank “PashaPay”yə icrası məcburi göstəriş verib

Azərbaycan Respublikasının Mərkəzi Bankı tərəfindən “PashaPay” MMC-də aparılan plandankənar tematik yoxlama zamanı qanunvericilik və normativ aktların tələblərinin pozulması halları aşkar edilib.

Valyuta.az xəbər verir ki, müəyyən edilmiş pozuntular cinayət yolu ilə əldə edilmiş əmlakın leqallaşdırılması və terrorçuluğun maliyyələşdirilməsinə qarşı mübarizə, eləcə də daxili nəzarət və risklərin idarə edilməsi sahələrini əhatə edib.

Bununla əlaqədar olaraq, “Mərkəzi Bank haqqında” Azərbaycan Respublikasının Qanununun 48.2.4-cü və “Ödəniş xidmətləri və ödəniş sistemləri haqqında” Azərbaycan Respublikasının Qanununun 63.1-ci maddələrinə əsasən, sözügedən çatışmazlıqların aradan qaldırılması məqsədilə “PashaPay” MMC-yə icrası məcburi olan göstərişlər verilib.

Mərkəzi Bank qeyd edib ki, göstərişlər aşkar edilmiş nöqsanların aradan qaldırılması və müvafiq sahələrdə fəaliyyətin qanunvericiliyin tələblərinə uyğunlaşdırılmasını nəzərdə tutur.