Məktəbə getməyə ehtiyac qalmaya bilər: Bu süni intellekt sizin üçün hər şeyi edir

Təhsil dünyası hələ süni intellektin tapşırıqlara kömək etməsinə alışmağa çalışarkən, prosesi tamamilə yeni səviyyəyə daşıyan texnologiya ortaya çıxıb. 

Valyuta.az xəbər verir ki, "Companion" startapının hazırladığı "Einstein" adlı süni intellekt aləti tələbəyə yalnız cavab vermir, eyni zamanda birbaşa tələbənin məktəb hesabına daxil olaraq bütün dərs yükünü onun əvəzinə idarə edir. Bir asistandan daha çox rəqəmsal "nümayəndə tələbə" kimi fəaliyyət göstərən bu sistem təhsildə avtomatlaşdırmanın sərhədlərini genişləndirir.

"Einstein" öz xüsusi virtual kompüterində işləyir. Tələbə "Canvas" kimi dərs idarəetmə sistemlərinə daxil olduqda, brauzeri açır, dərs səhifələrində gəzərək yayımlanan videoları sonuna qədər izləyir. Yalnız izləməklə kifayətlənməyən sistem oxu parçalarını analiz edir, inşa yazır, testləri həll edir və hətta müzakirə panolarında digər tələbələrlə qarşılıqlı əlaqə qurur.

Proqram bir dəfə qurulduqdan sonra arxa planda sakit şəkildə işləyir, tapşırıq son tarixlərini izləyərək ödevləri avtomatik olaraq sistemə yükləyir. "Companion" baş direktoru Advait Palival bildirir ki, tələbələr artıq süni intellektdən istifadə edirlər və onlar bu texnologiyanın daha inkişaf etmiş və funksional versiyasını təqdim edirlər.

Bu texnologiya ChatGPT kimi klassik söhbət botlarının hüdudlarını aşaraq "avtonom agent" prinsipi ilə işləyir. Yəni yalnız yazı yazmır, internetə çıxışı və fayl sistemini olan virtual kompüterdən istifadə edərək mürəkkəb addımları insan kimi yerinə yetirir. Bu isə təhsilçiləri və məktəb idarələrini çətin qərar qarşısında qoyur. İndiyə qədər müzakirələr daha çox "süni intellektdən yardım alma" ətrafında gedirdisə, Einstein ilə birlikdə mövzu "tələbənin yerini tamamilə başqa bir qüvvənin tutması" məsələsinə çevrilib. Bir tələbənin online dərsə yazılıb bütün semestri süni intellektə həvalə etməsi diplomun etibarlılığı məsələsini də gündəmə gətirir.

Digər tərəfdən, bəzi təhsilçilər bu vəziyyəti təhsilin transformasiyası üçün fürsət olaraq qiymətləndirir. Çikaqo Universitetindən Nicholas DiMaggio kimi mütəxəssislər mövcud online təhsil sistemlərinin artıq surətçəkməyə əlverişli olduğunu bildirir. Ona görə, bu cür alətlərin yayılması təhsilçiləri rəqəmsal tapşırıqlara etibar etmək əvəzinə, üz-üzə imtahanlara, şifahi qiymətləndirməyə və layihəyə əsaslanan öyrənmə metodlarına yönəlməyə məcbur edəcək.

Paşa Məmmədli