Ceff Bezos: onun ən yaxşı maliyyə qərarlarının xronologiyası

"Amazon.com" və "Blue Origin" şirkətlərinin milyarder təsisçisi Ceff Bezos varlı ailədə dünyaya gəlməyib.

Bir sıra ağıllı maliyyə qərarları onu bu gün olduğu mövqeyə – dünyanın ən zəngin insanlarından birinə çevirib. "Britannica"nın məlumatlarına əsasən, Bezosun ən uğurlu maliyyə qərarlarının xronologiyası aşağıdakı kimidir.

1986 – Universiteti bitirməsi

Bezos "Princeton University"ni elektrik mühəndisliyi və məlumat elmi üzrə iki ixtisasla, yüksək fərqlənmə ilə bitirib. Bu təhsil ona o dövrdə yeni formalaşmağa başlayan kompüter elmləri sahəsinin imkanlarından maksimum istifadə etməyə şərait yaradıb.

1994 – "Amazon"un təsis edilməsi

Bezos "Wall Street"də çalışarkən o zamankı həyat yoldaşı Makkenzi Skott ilə birlikdə onlayn kitab mağazası yaratmağa qərar verib. O, "D.E. Shaw & Co." investisiya bankında işlədiyi müddətdə internet haqqında geniş bilik əldə etmiş və onun potensialından yararlanmaq istəmişdi. Bezos və Skott "Amazon"u qarajda təsis ediblər. Şirkət ilk sifarişini 1995-ci ildə göndərib.

1998 – Kitablardan kənara genişlənmə

Kitab satışına başladıqdan üç il sonra Bezos məhsul çeşidinə CD və videolar əlavə etmək qərarına gəlib. Növbəti il o, digər onlayn mağazalara sərmayə qoymağa başlayaraq istehlakçıların günün 24 saatı "Amazon" vasitəsilə sifariş edə biləcəyi məhsul çeşidini daha da genişləndirib.

2000 – "Blue Origin"

Bezos 2000-ci ildə "Blue Origin" adlı özəl kosmik uçuş şirkətini təsis edib. İyirmi bir il sonra şirkət ilk pilotlu uçuşunu həyata keçirib. Uçuşda Bezos və onun qardaşı Mark ilə yanaşı daha iki nəfər iştirak edib.

2006 – "Amazon Web Services"

Texnologiyanın inkişafının yaratdığı imkanlardan istifadəni davam etdirən Bezos 2006-cı ildə "Amazon Web Services"i (AWS) istifadəyə verib. Hazırda AWS 30 faizdən çox bazar payı ilə dünyanın ən böyük bulud hesablama xidmətidir.

2007 – "Kindle"

"Amazon" 2007-ci ildə "Kindle" elektron oxu cihazını təqdim edib və üç il ərzində elektron kitabların satışı ənənəvi çap kitablarının satışını geridə qoyub.

2013 – "The Washington Post"

Bezos 2013-cü ildə nüfuzlu "The Washington Post" qəzetini və ona bağlı nəşrləri 250 milyon dollara satın alıb.

Bu maliyyə qərarları Bezosun fövqəladə uğurunun əsasını təşkil edib. "Forbes"un məlumatına görə, 14 fevral 2026-cı il tarixinə Bezosun sərvəti 214,2 milyard dollar təşkil edir və bu göstərici ilə o, dünyanın dördüncü ən varlı şəxsi sayılır. Onun sərvətinin böyük hissəsi "Amazon" və "Blue Origin" səhmlərində cəmlənib.

Tənzilə Ağabalayeva