Marketinqdən başlayıb Dünya Bankının rəhbəri olan şəxs - SƏHƏR OXUSU

Ajay Banga qlobal maliyyə sektorunda uzun illər ərzində formalaşmış rəhbərlərdən biri kimi tanınır.

Valyuta.az xəbər verir ki, o, karyerasına satış və marketinq sahəsində başlayaraq beynəlxalq korporativ mühitdə addım-addım yüksəlib və nəticədə “Mastercard”ın baş icraçı direktoru vəzifəsinə qədər çatıb.

1959-cu ildə Hindistanda anadan olan Banga iqtisadiyyat üzrə təhsil alıb, daha sonra "Indian Institute of Management Ahmedabad"da idarəetmə üzrə magistr dərəcəsi əldə edib. Onun peşəkar fəaliyyəti “Nestlé” şirkətində başlayıb, burada satış və marketinq sahəsində işləyərək biznesin əsas prinsiplərini mənimsəyib.

Daha sonra o, “Citigroup”da fəaliyyətini davam etdirib və uzun illər ərzində müxtəlif rəhbər vəzifələrdə çalışıb. Bu dövrdə Banga həm inkişaf etmiş, həm də inkişaf etməkdə olan bazarlarda işləyərək beynəlxalq maliyyə sistemini yaxından öyrənib.

2010-cu ildə Ajay Banga “Mastercard”ın baş icraçı direktoru təyin edilıb. Onun rəhbərliyi dövründə şirkət ənənəvi kart operatorundan daha geniş miqyaslı maliyyə texnologiyaları platformasına çevrilib, rəqəmsal ödənişlər və innovativ həllər sahəsində mövqeyini gücləndirə bilib. Bu illər ərzində “Mastercard” qlobal ödəniş sistemində aparıcı oyunçulardan biri kimi fəaliyyətini genişləndirib.

2021-ci ildə o, bu vəzifədən ayrılıb. Sonrakı dövrdə beynəlxalq iqtisadi təşəbbüslərdə iştirak edən Banga 2023-cü ildə Dünya Bankının prezidenti vəzifəsinə təyin olunub.

Mayya Hüseynova