Mark Zukerberq Mayamidə 170 milyon dollarlıq malikanə alıb

Mark Zukerberq Mayamidə malikanə alıb.

Valyuta.az xəbər verir ki, "Meta" şirkətinin baş icraçı direktoru Mark Zukerberq Mayami-Deyd dairəsində rekord məbləğə daşınmaz əmlak alışı həyata keçirib. Bu barədə "Wall Street Journal" nəşri məlumat yayıb.

Məlumata görə, milyarder və onun həyat yoldaşı Prissilla Çan bazar ertəsi Biskein körfəzində yerləşən, “Billionaire Bunker” kimi tanınan qapalı və elit Indian Krik adasında 170 milyon dollar dəyərində malikanənin alışını rəsmiləşdiriblər. Sövdələşmə Mayami-Deyd dairəsi üzrə ən yüksək satış qiyməti kimi qeydə alınıb.

Hazırda tikintisi davam edən mülk iki akr ərazidə yerləşir. İlkin layihəyə əsasən, 30 min kvadrat fut sahəni əhatə edəcək evdə doqquz yataq otağı, hovuz, şəxsi yaxta dayanacağı, 1 500 qallonluq akvarium və gizli keçidi olan kitabxana nəzərdə tutulub. Malikanənin dizaynı Ferris Rafauli tərəfindən hazırlanıb.

Əmlak 2025-ci ilin noyabrında "Coldwell Banker Realty" şirkətinin agentləri Denni və Cill Hertsberq tərəfindən 200 milyon dollara satışa çıxarılmışdı. Torpaq sahəsi isə 2020-ci ildə məşhur estetik cərrah doktor Aaron Rollins və həyat yoldaşı, daşınmaz əmlak agenti Marin Rollins tərəfindən 30 milyon dollara alınmışdı.

Sahəsi 294 akr olan Indian Krik adasında cəmi 41 ev və 84 nəfər əhali yaşayır. Ərazi uzun illərdir milyarderlər üçün cəlbedici məkan hesab olunur. Burada "Amazon"un qurucusu Ceff Bezos, maliyyəçi Karl Aykan, keçmiş NFL ulduzu Tom Breydi, İvanka Tramp və Cared Kuşner kimi tanınmış şəxslər də mülklərə sahibdirlər.

Qeyd edək ki, Mark Zukerberqin sərvəti 223,5 milyard dollar təşkil edir və o, hazırda dünyanın ən varlı dördüncü şəxsi sayılır. Onun sərvətinin əsas hissəsi 2004-cü ildə təsis etdiyi, əvvəlki adı "Facebook" olan "Meta" şirkətindəki 13 faizlik payından formalaşır.

Tənzilə Ağabalayeva