Azərbaycanda ən məşhur telefon markalarının bazar payı açıqlandı

Azərbaycanda mobil telefon bazarında fevral ayında da lider mövqeyi Samsung qoruyub, lakin şirkətin bazar payında azalma qeydə alınıb.

Valyuta.az xəbər verir ki, Samsungun bazar payı yanvar ayında 28,77% olduğu halda, fevralda 24,16%-ə geriləyib. Buna baxmayaraq, şirkət bazarın ən böyük payına sahib brend olaraq qalır.

Apple isə əksinə, artım nümayiş etdirib. Şirkətin bazar payı yanvarda 20,87% olduğu halda, fevralda 23,03%-ə yüksəlib.

Xiaominin bazar payında azalma müşahidə olunub. Yanvarda 21,56% olan göstərici fevralda 18,22%-ə düşüb.

Digər brendlər arasında Honor artım göstərərək 3,72%-dən 4,16%-ə yüksəlib. Huawei isə zəif dinamika nümayiş etdirib – şirkətin bazar payı yanvarda 1,76%, fevralda isə 1,55% olub.

Beləliklə, fevral ayında bazarda əsas diqqət Samsung və Xiaomi-nin pay itirməsi, Apple və Honor-un isə mövqelərini gücləndirməsi ilə müşahidə olunub.

Sərvanə Rəmixanova