"Lüks alış-verişin 75%-ni aşağı gəlirli insanlar edir"

“Gucci”, “Dior”, “Chanel” və “Louis Vuitton” kimi lüks brendlərin əsas müştəri kütləsinin varlılar olduğu düşünülür. Lakin müxtəlif araşdırmalar bu fikri təkzib edir: lüks istehlakın təxminən 75 faizi aşağı və orta gəlirli insanlar tərəfindən həyata keçirilir.

Bəs maddi imkanları məhdud olan şəxsləri bu qədər bahalı və funksional baxımdan əhəmiyyətsiz məhsullar almağa nə vadar edir?

Valyuta.az bu tendensiyanın üç əsas səbəbini araşdırıb.

Birincisi, status axtarışı ilə bağlıdır. Lüks məhsullar istifadəçinin sosial mövqeyini nümayiş etdirən simvollar hesab olunur. Cəmiyyətdə güclü, nüfuzlu və uğurlu təsir bağışlamaq istəyən şəxslər bu cür məhsullara üstünlük verirlər. Maraqlıdır ki, həqiqətən varlı insanlar adətən loqosuz və sadə geyimləri seçir, çünki onların sosial statusunu sübut etməyə ehtiyacı yoxdur. Əksinə, daha az imkanlı şəxslər bu statusu nümayiş etdirmək məqsədilə iri və nəzərəçarpan loqolu məhsullara meyl edirlər.

İkinci səbəb sosial kimliklə bağlıdır. Lüks məhsullar insanın “Mən kiməm?” sualına verdiyi cavabın bir parçasına çevrilir. Bu məhsulları əldə edənlər özlərini müəyyən sosial təbəqəyə aid hiss edirlər. Bahalı “Gucci” geyimlərini geyinən biri, şüuraltı şəkildə özünü yüksək təbəqənin üzvü kimi qəbul edir.

Üçüncü səbəb isə emosional məmnunluqdur. Lüks məhsul almaq, xüsusilə də çətin həyat şəraiti ilə qarşılaşan insanlar üçün qısa müddətli mükafatlandırma və uğur hissi yaradır. Bu səbəbdən bu tip alış-verişlər çox vaxt rasional deyil, emosional qərarlarla həyata keçirilir.

Nəticə etibarilə, bu cür xərcləmələr çox vaxt marketinq vasitəsilə yaradılmış emosional təsirin nəticəsidir. Lüks brendlərin yaratdığı cazibə, alıcının real ehtiyaclarından daha çox onun özünüifadə tələbatına və psixoloji ehtiyaclarına cavab verir.

Mayya Hüseynova