“Nvidia”dan robotlara insan kimi düşünməyi öyrədən yeni model gəlir

“Nvidia” robotların "insan kimi" davranmasını təmin edən “Isaac GR00T N1” modelini təqdim edib. 

Valyuta.az xarici mənbəyə istinadən xəbər verir ki, açıq mənbəli olan bu model əvvəlcədən öyrədilmiş, lakin fərdiləşdirilə bilən bir sistem kimi nəzərdə tutulub. Model, insansı robotların inkişaf etdirilməsi və yeni bacarıqlar qazanması üçün istifadə olunacaq. Şirkətlər artıq bu modeldən istifadə edən robotlar üzərində işləməyə başlayıblar.
“Nvidia”nın baş direktoru Censen Xuanç açıqlamasında artıq "robotik dövrün gəldiyini" bildirib. Onun sözlərinə görə, “Isaac GR00T N1” robotik sistemlərin inkişaf etdirilməsində mühüm rol oynayacaq.

Şirkət “Isaac GR00T N1”i insan reflekslərinə və instinktlərinə bənzər şəkildə davranan "sürətli düşünən bir hərəkət modeli" kimi təsvir edir. Model həm real insanların məlumatları, həm də “Nvidia”nın “Omniverse” platformasının yaratdığı sintetik məlumatlarla öyrədilib. Əsas məqsəd robotların daha insanabənzər davranışlar sərgiləməsinə nail olmaqdır.

Bu çərçivədə Isaac “GR00T N1” modelindən güc alan ilk robot da təqdim edilib. “1X Technologies” tərəfindən hazırlanmış bu insansı robot “NEO Gamma” adlanır. Robot avtonom yığım kimi funksiyaları yerinə yetirməklə yanaşı, “Nvidia”nın modeli sayəsində düşünmə və digər bacarıqlarını da inkişaf etdirə bilir.

Sərvanə Rəmixanova