Kredit borcu olan əsgərlərə güzəşt varmı?

Hərbi xidmətə gedən, xəstə olan və ya xəstəxanada yatan şəxslər üçün kreditlərlə bağlı qanunvericilikdə hər hansı xüsusi güzəşt nəzərdə tutulmayıb. Kredit ödənişlərinin dondurulması, faizlərin və ya cərimələrin hesablanmasının dayandırılması, ödəniş müddətinin avtomatik uzadılması kimi mexanizmlər mövcud deyil.

Valyuta.az xəbər verir ki, bu sözləri Axar.az-a açıqlamasında hüquqşünas Əkrəm Həsənov hərbi xidmətə çağırılan vətəndaşların kredit öhdəlikləri barədə danışarkən deyib.

"Adətən belə hallarda banklar tənqid olunur. Amma nəzərə almaq lazımdır ki, bank öz pulunu kredit vermir. Bank əmanətçilərdən vəsait cəlb edir və həmin vəsaitə görə faiz ödəyir. Əgər qanunla bankların üzərinə kreditlərin dondurulması və ya ödənişlərin dayandırılması öhdəliyi qoyulsa, bu, maliyyə sektorunda əlavə problemlər yarada bilər.

Banklar istəsələr, fərdi qaydada müştərilərinə güzəşt tətbiq edə bilərlər. Vətəndaş banka müraciət edə bilər və bank da vəziyyəti nəzərə alaraq müəyyən güzəştlər edə bilər. Bu, tamamilə könüllü xarakter daşıyır", - o bildirib.

Ə.Həsənov hesab edir ki, problemin həlli üçün dövlət mexanizmi yaradılması daha məqsədəuyğun olardı:

"Məncə, qanunvericilikdə elə bir mexanizm nəzərdə tutula bilər ki, hərbi xidmətə çağırılan və ya müəyyən səbəbdən gəlir əldə edə bilməyən şəxslərin kredit ödənişlərini müvəqqəti olaraq dövlət qarşılaya bilsin. Həmin şəxs xidmətini başa vurduqdan və ya normal həyatına qayıtdıqdan sonra isə bu vəsaiti dövlətə geri ödəsin. Belə bir yanaşma daha məntiqli olardı. Çünki vətəndaşı hərbi xidmətə dövlət çağırır və onun maliyyə öhdəlikləri də nəzərə alınmalıdır. Hazırda belə bir hüquqi mexanizm yoxdur. Bank özəl sahibkardır və xeyriyyə fondu deyil. Ona görə də bütün yükün bankların üzərinə qoyulması düzgün yanaşma sayılmaz".