İşə qəbul ediləcəyinizə inamsızlıq yaradan nüanslar

Vüsal X. Şahinoğlu 
  İnsan resursları mütəxəssisi

Bir çox şəxslər iş axtarışı zamanı çox müsahibəyə gedirlər, bir müddət sonra həvəsdən düşürlər. Müsahibəyə gedərkən, onsuz da "yox" deyəcəklər - kimi düşünürlər və artıq işə qəbul olacaqlarına inamsızlıq yarana bilir. Bu, əmək bazarında çox rastlanan haldır.

Buna bir tərəfdən baxmamalıyıq. Yəni iş axtaran şəxsdə də xətalar olur, işçi axtaran tərəflərdə də. İş axtaran ard-arda müsahibələrə çağrılır, amma heç birindən geridönüş almır. Xətalara iş axtaran tərəfdən baxaq.

1) CV düzgün tərtib edilmir. Şəkil hansısa kafedə stolda oturmuş vəziyyətdə, ya da çəmənlikdə, toy sarayında selfie çəkərkən və s. Bu qeyri-ciddi təəssürat yaradır. İş təcrübəsi və təhsil məlumatları əskik daxil edilir. Əlavə məşğuliyyət qoymaq əksər vaxtlarda namizəd üçün mənfi sayılır. Kimsə gəzməyi, balıq tutmağı sevirsə, onu CV-yə yazmaq bir az konteksdən kənar sayılır. 

2) CV göndərərkən email ünvanı düz seçilmir. [email protected], [email protected] kimi ciddi olmayan email ünvanlarının seçilməsi uğursuzluq gətirə bilir. Qarşı tərəfdən baxanda, ciddi qəbul olunmur.

3) CV göndərəndə başlıq yazmaq və ən azından mətn hissəsinə də 1-2 cümlə yazmaq lazımdır. Bunlar edilməyəndə şans azalır.

4) Namizəd müsahibədə diqqət etməli olduğu şeylərə diqqət etmir. Yəni ilk dəqiqənin təəssüratı vacibdir. Bədən dili vacibdir. Bunlar müsahibənin qalan müddətinin müsbətə ya da mənfiyə gedəcəyinə qərar verən faktorlardır. Namizəd ilk dəqiqədə səhvlər buraxır, amma sonrakı gedişatda suallara cavab versə də, seçilmir.

Bu siyahını uzatmaq da olar. Ən çox edilən xətaları qeyd etdim.

İşçi axtaran tərəfdən baxsaq, burda da müəyyən məqamlar ortaya çıxır.

1) Müsahibəni səriştəsi yetərsiz mütəxəssislər etməyə çalışırlar. Əksəriyyəti mikro menecmentin qurbanı olanlar, özləri nəyəsə qərar verməyə qadir olmayanlardır.

2) Qarşı tərəfi “möhtac” görmək. Bu da iş axtaran üzərində nəticəyə və gedişata təsir edə bilir.

3) Namizədlərin bacarıq, bilik və səriştələrini yoxlayan, ölçən suallar və tapşırıqlarla işləmək yerinə, mənasız və heç bir ölçü meyarı olmayan klişeləşmiş suallar vermək.

4) Namizəd həqiqətən yaxşı olsa da, səriştəsiz işəqəbul mütəxəssisi saysız hesabsız CV lər arasında batıb qalır, geri dönüş gecikir və namizəd gözdən qaçır.

Burada da əsas nüansları qeyd etdim. Siyahını uzatmaq olar.

Ümumilikdə, bu kimi hallar səbəbindən insanlar müəyyən müddət sonra həvəsdən düşürlər. Həvəsdən düşməmək üçün elandakı vakansiyanın tələb və şərtlərinin özünə uyğun olduğunu yoxlayıb müsbət qərara gələn iş axtaran şəxs, sonra da qurumu-şirkəti araşdırmalıdır ki, o mühit görəsən özünə uyğundurmu? Hər vakansiyaya doğru hazırlanmamış CV göndərən insanların həvəsdən düşməyi də normal haldır.