İnvestorlar səhm alarkən hansı baş icraçı direktorları diqqətdə saxlamalıdır?

Bütün baş icraçı direktorlar şirkətin fəaliyyətində mühüm rol oynayır, lakin bəzilərinin təsiri digərlərindən qat-qat böyükdür.

Buna misal olaraq "Tesla"nın baş icraçı direktoru və dünyanın ən varlı şəxsi olan İlon Maskı göstərmək olar. Mask yaxın vaxtlarda stimullaşdırıcı şərtlərlə zəngin yeni əməkhaqqı paketi əldə edib ki, bu da onu dünyanın ilk trilyonçusu edə bilər. Bu fakt göstərir ki, "Tesla"nın direktorlar şurası (və bir çox investorlar) Maskı şirkətin ən dəyərli aktivi hesab edir və onu gələcəyə aparmaq üçün yüksək məbləğ ödəməyə hazırdır.

Bəs investorlar səhm alarkən hansı baş icraçı direktorları diqqətdə saxlamalıdır? Mask və daha dörd rəhbərə nəzər salaq.

Həmçinin baxın: baş icraçı direktorlar və digər top-menecerlər əslində necə varlanırlar.

İlon Mask, "Tesla" (TSLA)

Baş icraçı direktor kimi fəaliyyətə başlama tarixi: oktyabr 2008
Xalis sərvət (13 fevral tarixinə): 850,2 milyard dollar

13 fevral tarixinə Maskın xalis sərvəti 850,2 milyard dollar təşkil edir və o, dünyanın ən varlı şəxsidir. Onun yeni əməkhaqqı paketi isə son dövrlər "Tesla"nın müəyyən çətinliklərlə üzləşməsinə baxmayaraq, investorları öz liderlik bacarığına inandırmaq qabiliyyətinin göstəricisi kimi qiymətləndirilir. Şirkətdə gəlir artımının zəifləməsi, mənfəətin azalması və avtonom idarəetmə texnologiyası ilə bağlı problemlər müşahidə olunur. "The Motley Fool"un məlumatına görə, “Böyük Qısa Mövqe” ilə tanınan investor Maykl Berri yaxın vaxtlarda "Tesla"nın səhmlərini “həddindən artıq şişirdilmiş” adlandırıb.

Bəs niyə "Tesla"nın səhmləri (və Maskın sərvəti) artmaqda davam edir?

"The Options Oracle AI Trade Manager" şirkətinin qurucusu Edvard Korona daha əvvəl bildirib ki, burada əsas məsələ "Tesla"nı avtomobil şirkəti, texnologiya şirkəti və ya tamamilə fərqli bir qurum kimi görməkdən asılıdır. Onun sözlərinə görə, İlon Maska yatırım edənlər əvvəllər iddialı layihələri reallaşdırmış bir rəhbərə güvənirlər, lakin eyni zamanda dalğalanmalara da hazır olmalıdırlar.

Censen Huanq, "Nvidia" (NVDA)

Baş icraçı direktor kimi fəaliyyətə başlama tarixi: aprel 1993 (şirkətin həmtəsisçisi)
Xalis sərvət (13 fevral tarixinə): 160 milyard dollar

Huanqın baş icraçı direktor kimi əhəmiyyətini anlamaq üçün səhmlərin kəskin artımına baxmaq kifayətdir. "First Information" şirkətinin qurucusu və baş icraçı direktoru, eləcə də "The Millionaire Dropout" kitabının müəllifi Vins Stanzionenin sözlərinə görə, "Nvidia" səhmlərinə sahib olmasalar belə, əksər investorlar S&P 500 indeksində şirkətin yüksək payına görə dolayı yolla bu şirkətə yatırım ediblər. Stanzione bildirib ki, texnologiya sektoru və süni intellekt bazarı Huanqın hər açıqlamasına diqqət kəsilir. Onun çıxışları səhmlərin qiymətində 5 faiz və daha çox dəyişiklik yarada, bununla da S&P 500 indeksinə təsir göstərə bilər.

Hok Tan, "Broadcom" (AVGO)

Baş icraçı direktor kimi fəaliyyətə başlama tarixi: mart 2006
Xalis sərvət (sentyabr 2025 tarixinə): 1,2 milyard dollar

"Rainwater Equity" şirkətinin baş icraçı direktoru və "Rainwater Equity ETF" fondunun portfel meneceri Cozef Şapoşnikin sözlərinə görə, Tan "Broadcom"u adi yarımkeçirici biznesindən “texnologiya nəhəngi”nə çevirə bilib. O bildirib ki, Tan ondan çox yarımkeçirici şirkətini satın aldıqdan sonra biznes istiqamətini proqram təminatı şirkətlərinin alınması və inkişafına yönəldib. Bu strategiya "VMware" şirkətinin irimiqyaslı alınması ilə zirvəyə çatıb. Bundan əlavə, o, ənənəvi xüsusi təyinatlı ASIC biznesini yenidən mövqeləndirərək 2030-cu ilə qədər 80 milyard dollar gəlir gətirə biləcək TPU-ların (tenzor emal blokları) istehsalına istiqamətləndirib.

Ceymi Daymon, "JPMorganChase" (JPM)

Baş icraçı direktor kimi fəaliyyətə başlama tarixi: yanvar 2006
Xalis sərvət (13 fevral tarixinə): 2,8 milyard dollar

Stanzionenin sözlərinə görə, Daymon texnologiya sektorundan kənarda ən çox izlənilən baş icraçı direktorlardan biridir. Bu, əsasən onun səhmdarlara ünvanladığı illik məktublar, iqtisadi proqnozlar və siyasətə dair şərhlərlə bağlıdır. Həmin açıqlamalar təkcə "JPMorganChase"in səhmlərinə deyil, ümumilikdə bank sektoru indekslərinə təsir göstərə bilir.

Liza Su, "Advanced Micro Devices" (AMD)

Baş icraçı direktor kimi fəaliyyətə başlama tarixi: oktyabr 2014
Xalis sərvət (13 fevral tarixinə): 1,4 milyard dollar

Stanzionenin sözlərinə görə, Su 2014-cü ildə rəhbərliyi üzərinə götürdükdən sonra "AMD"ni demək olar ki, dağılmaqdan xilas edib. O qeyd edib ki, investorlar onun məhsul yol xəritələrinə həssas reaksiya verir və onun fikrincə, Su texnologiya və süni intellekt sahəsində aparıcı qadın baş icraçı direktordur. 2026-cı ildə diqqətlə izlənilməli rəhbərlərdən biri də məhz odur.