"Harper" 47 milyon dollar investisiya alıb

Sığorta və risk idarəetməsi sahəsində fəaliyyət göstərən "Harper" 47 milyon dollar investisiya cəlb edib. 

Valyuta.az xəbər verir ki, şirkət yeni investisiyanı mühəndislik komandasının genişləndirilməsinə, texnologiyanın təkmilləşdirilməsinə və brend tanınmasının artırılmasına yönəldəcəyini açıqlayıb.

2024-cü ildə Dakotah Rays (Dakotah Rice) və Tuşar Nair (Tushar Nair) tərəfindən təsis edilən "Harper" süni intellekt dəstəkli sığorta brokeri kimi fəaliyyət göstərir. Şirkət əsasən kiçik və orta sahibkarlıq subyektlərinə xidmət göstərir. "Harper" işçi kompensasiyası, ümumi məsuliyyət və peşə məsuliyyəti kimi sığorta məhsullarını təqdim etmək üçün 160-dan çox sığorta təminatçısı ilə əməkdaşlıq edir.

Şirkəti oxşar platformalardan fərqləndirən əsas xüsusiyyət əməliyyatların demək olar ki, tamamilə süni intellekt vasitəsilə idarə olunmasıdır. "Harper" müraciətlərin yönləndirilməsi, anderrayter proseslərinin izlənməsi, sənədlərin toplanması və müştəri idarəetməsi kimi əməliyyatları avtomatlaşdırır. Bunun nəticəsində ənənəvi brokerlərdə bir neçə gün çəkən proseslər 1-2 gün ərzində tamamlanır və şirkət ayda 1000-dən çox müştəriyə xidmət göstərir.

Şirkət biznes modelini Mərkəzi Amerikadakı real sektor müəssisələri üzərində qurub. Uşaq bağçaları, restoranlar, istehsal müəssisələri, avtomobil dilerləri və yerli barlar Harper-in əsas hədəf auditoriyasını təşkil edir. Şirkət yalnız sığorta xidməti göstərməklə kifayətlənmir, uzunmüddətli perspektivdə sahibkarların risk, uyğunluq və back-ofis proseslərini sadələşdirərək onların fəaliyyətini asanlaşdırmağı hədəfləyir.

Mayya Hüseynova