Britaniya banknotlarında Çörçillə Ostini quşlar və heyvanlar əvəzləyəcək

İngiltərə Bankı yeni banknot seriyası hazırlayır: tarixi şəxslərin, o cümlədən Uinston Çörçil və Ceyn Ostinin şəkilləri yerinə nadir quşlar və heyvanların təsvirləri qoyulacaq.

Valyuta.az bu barədə BBC-yə istinadən xəbər verir.

Ekspertlərin fikrincə, quş və heyvan təsvirlərini saxtalaşdırmaq insan üzü təsvirindən çətindir. Tezliklə vəhşi təbiət üzrə mütəxəssislər Britaniyada yaşayan nadir quş və heyvanların siyahısını hazırlayacaqlar.

Banknotların dizaynının dəyişdirilməsi mövzusu 2025-ci ilin yayında müzakirə olunub. O zaman İngiltərə Bankı bir neçə variant təqdim edib: memarlıq və turistik yerlər, incəsənət, mədəniyyət və idman, ölkənin tarixində mühüm hadisələr, innovasiya və kəşflər, təbiət və mənzərələr. Sorğuya qatılan britaniyalıların təxminən 60%-i təbiət təsvirlərini, 56%-i memarlığı seçib. Tarixi hadisələr ən az səs (19%) alıb.

Qeyd olunur ki, 1960-cı ildən İngiltərə Bankı banknotlarda monarxın şəkillərini yerləşdirib, 1970-ci ildən isə tarixi şəxslər təsvir olunmağa başlayıb. İlk şəxs Uilyam Şekspir olub. Hal-hazırda dövriyyədə Uinston Çörçil, Ceyn Ostin, Cozef Törner və Alan Tyuringin təsviri olan banknotlar mövcuddur.

Paşa Məmmədli