“Binance”ın qurucusu CZ indi Bill Qeytsdən daha varlıdır

Kriptovalyuta dünyasının ən məşhur simalarından biri olan Çanqpenq Zhao (CZ) yenidən milyarderlər siyahısında diqqət mərkəzinə düşüb. “Forbes” jurnalının hesablamalarına görə, onun şəxsi sərvəti hazırda 110 milyard dollara çatıb və bu göstərici ilə o, dünyanın ən varlı insanları siyahısında 17-ci yeri tutur. Bu nəticə CZ-ni hətta Bill Qeytsdən də varlı edir.

Həbsdən milyardlara

Təxminən bir il yarım əvvəl CZ çətin dövr yaşayırdı. Onun qurduğu “Binance” ilə bağlı ABŞ-da aparılan geniş araşdırmadan sonra Zhao pul yuyulmasına qarşı effektiv nəzarət sistemi qurmadığını etiraf etmişdi.

Nəticədə o, 50 milyon dollar şəxsi cərimə ödəməyə, “Binance” şirkətinin isə 4,3 milyard dollar cərimə ödəməsinə, CEO vəzifəsindən istefa verməyə və Kaliforniyada 4 ay həbs cəzası çəkməyə razı olmuşdu.

Lakin aradan cəmi 17 ay keçdikdən sonra onun maliyyə vəziyyəti tamamilə dəyişdi.

Sərvətin əsas mənbəyi – “Binance”

CZ-nin sərvətinin böyük hissəsi yenə də qurucusu olduğu “Binance” şirkətindən gəlir. Şirkət öz maliyyə göstəricilərini açıq şəkildə paylaşmasa da, sənaye ekspertlərinin qiymətləndirmələrinə görə “Binance”-in dəyəri təxminən 100 milyard dollardır, CZ isə şirkətin təxminən 90%-nə sahibdir

Birja dünya kripto bazarının təxminən 38%-ni idarə edir

Məlumatlara görə, Binance 2024 və 2025-ci illərdə 16–17 milyard dollar gəlir əldə edib. Müqayisə üçün, ABŞ-da fəaliyyət göstərən “Coinbase” həmin dövrdə 6,6 milyard dollar gəlir qazanıb.

Bundan əlavə, “Binance” ekosisteminə daxil olan “BNB Chain” blokçeyn şəbəkəsinin bazar dəyəri də 88 milyard dollar civarındadır.

Siyasi amillər və yeni əlaqələr

CZ-nin sərvətinin artdığı dövr ABŞ-da siyasi dəyişikliklərlə də üst-üstə düşür. Donald Tramp kriptovalyutaya daha müsbət yanaşan siyasət vədləri ilə yenidən hakimiyyətə gəlib.

Bu dövrdə “Binance”, Trump ailəsinin kripto layihəsi olan “World Liberty Financial” ilə əməkdaşlıq edib. Abu-Dabi investisiya fondu “MGX” tərəfindən “Binance”ə 2 milyard dollarlıq investisiya qoyularkən həmin layihənin “USD1” stablecoini ödəniş vasitəsi kimi qəbul olunub.

Bundan bir müddət sonra Trump CZ-ni tam şəkildə əfv edib və Zhao yenidən ABŞ biznes dairələrində görünməyə başlayıb.

Bununla belə, Binance ətrafında mübahisələr tamamilə bitmiş sayılmır. Son aylarda bəzi beynəlxalq media qurumları şirkətin sanksiya altında olan İran təşkilatlarına yönəlmiş əməliyyatları araşdıran əməkdaşları işdən çıxardığını iddia edib. Binance isə bu ittihamları rədd edərək qanunlara uyğun fəaliyyət göstərdiyini bildirib.

Şəbnəm İbrahimxəlilova