Bilet satmaq niyə qanunsuz sayılır?

İnsanların səbirsizliklə gözlədiyi konsertlər, tədbirlər və.s olur ki, bu zaman yaranan ən böyük problemlərdən biri də bilet tapmaq olur. Bu kimi situasiyalarda biletlər tez bir zamanda tükənir. Lakin konsertə, tədbirə və.s bir-iki gün qalmış həmin biletlər qarabazarda daha baha qiymətə satışa çıxarılır. Buna nümunə son günlərdə "Qarabağ" - "Çelsi" futbol oyununun biletlərini qeyri-qanuni yolla onlayn satışa çıxaran bir qrup şəxsin tutulması oldu. Bəziləri bunu qanunsuzluq hesab etmədi. Belə satış hansı hallarda “qarabazar əməli” kimi qiymətləndirilir?

Məsələ ilə bağlı hüquqşünas Ramil Süleymanov Valyuta.az-a bildirdi ki, bu hal bir neçə aspektdən qanunsuz fəaliyyət kimi qiymətləndirilə bilər: “Məsələ təkcə idman tədbiri ilə bağlı deyil, ictimai maraqlara təsir edən məsələdir. Əgər sistemdə hər şəxs üçün limitli sayda bilet nəzərdə tutulubsa, lakin həmin biletlər qabaqcadan əlbir olan şəxslər və ya qruplaşmalar tərəfindən toplanıb sonradan satışa çıxarılırsa, bu artıq qeyri-qanuni əməliyyat hesab olunur”.

R.Süleymanov deyib ki, belə hallarda məqsəd biletləri yüksək qiymətə satmaqla qanunsuz gəlir əldə etməkdir: “Məsələn, vətəndaş 20 manata aldığı bileti 40-50 manata satırsa, bu artıq vergidən yayınma və qeyri-qanuni gəlir sayılır. Həmin şəxslər faktiki olaraq dövlətə vergi ödəmədən qazanc əldə etmiş olurlar”.

Hüquqşünas hesab edir ki, belə hallar cəmiyyətin idman və mədəniyyət tədbirlərinə etimadına zərər vurur və bu səbəbdən hüquq-mühafizə orqanları tərəfindən ciddi şəkildə araşdırılmalıdır.

“Fərqi yoxdur, bu proses futbol bileti, konsert və ya qatar bileti ilə bağlı olsun - əgər məqsəd qeyri-qanuni yolla gəlir əldə etməkdirsə, həmin əməl qanun qarşısında eyni məsuliyyət daşıyır”, - deyə o əlavə edib.

Sərvanə Rəmixanova