"Bazarstore" məhsulları üzərində göstərilən qiymətdən daha baha satıb - Protokol tərtib edildi

Antiinhisar və İstehlak Bazarına Nəzarət Dövlət Agentliyi 2026-cı ilin yanvar- fevral ayları üzrə tərtib etdiyi inzibati xəta protokollarına dair məlumata əsasən, iki şirkət - “Tam Store” MMC və “Bazarstore” MMC barəsində protokol tərtib edilib.

Valyuta.az xəbər verir ki, yoxlamalar zamanı sözügedən marketlər şəbəkələrində qida məhsullarının üzərində göstərilən qiymətdən daha baha satıldığı müəyyən olunub.

Məlumata görə, “Tam Store” MMC barəsində 12 yanvar, “Bazarstore” MMC barəsində isə 10 fevral 2026-cı il tarixində inzibati xəta haqqında protokol tərtib edilib.

Hər iki fakt “İstehlakçıların hüquqlarının müdafiəsi haqqında” Azərbaycan Respublikasının Qanununun 13-cü maddəsinin 1-ci bəndinin pozulması kimi qiymətləndirilib.

Xatırladaq ki, İnzibati Xətalar Məcəlləsinin 447.0.1-ci maddəsinə əsasən, malın hesabına dair istehlakçının az miqdarda aldadılması hallarında hüquqi şəxslər 4 000 manatdan 6 000 manatadək məbləğdə cərimə oluna bilər.

Sərvanə Rəmixanova