Banklar niyə bəzi valyutaları almır?

Azərbaycanda bəzi xarici valyutaları dəyişmək mümkün olsa da, müəyyən ölkələrin pul vahidləri banklarda qəbul edilmir. Məsələn, hansısa ölkəyə səfər edən vətəndaşın əlində həmin ölkənin valyutası qalırsa, o bu pulu Azərbaycanda dəyişə bilmir.  Vətəndaş ölkədə qəbul olunmayan xarici valyutanı harada və necə dəyişdirə bilər?

Ekspert Əkrəm Həsənov Valyuta.az-a bildirib ki, bankların bütün valyutaları mütləq şəkildə dəyişmək kimi öhdəliyi yoxdur. Onun sözlərinə görə, bank maliyyə vasitəçisidir və yalnız dövriyyəsi olan valyutanın alış-satışında maraqlı olur:

“Bank pulu alver məqsədilə dəyişir. Yəni, dollar, avro, rubl, funt kimi geniş istifadə olunan valyutalar bank üçün likviddir. Bank bilir ki, bu valyutanı ondan gələcəkdə başqa müştəri alacaq. Əgər hər hansı valyuta Azərbaycanda tələbat görmürsə, bankın onu qəbul etməsi iqtisadi cəhətdən məqsədəuyğun deyil”.

Ekspert qeyd edir ki, bəzi nadir və ya məhdud istifadə olunan valyutalara yerli bazarda demək olar ki, tələbat olmur: “Xarici valyutanı heç kim almayacaqsa və yaxud yalnız nadir hallarda alacaqlarsa, bank bu pulu niyə alsın?"

Bu halda vətəndaşın alternativ yolu yalnız həmin valyutanın dövriyyədə olduğu ölkəyə yenidən səfər edənlərdir: “Əgər kimdəsə nadir valyuta qalıbsa, onu yalnız həmin ölkəyə gedən və həmin pula real ehtiyacı olan şəxslərə təklif edə bilər".

Sərvanə Rəmixanova