"Aqrarkredit" daşınmaz əmlakı 30% endirimlə hərraca çıxarır

"Aqrarkredit" QSC Bank Olmayan Kredit Təşkilatı balansında olan iki qeyri-yaşayış sahəsini təkrar hərraca çıxarır.

Valyuta.az xəbər verir ki, hərrac 14 iyul tarixində keçiriləcək.

Qurumun açıqladığı məlumata əsasən, satışa çıxarılan əmlaklar Abşeron rayonu, Xırdalan şəhəri, Bakı–Sumqayıt şosesinin 7-ci kilometrində yerləşən "Abşeron Gənclər şəhərciyi" yaşayış kompleksində yerləşir.

Hərraca çıxarılan əmlaklardan biri kompleksin 5 saylı binasında yerləşən Avtodayanacaq-1 qeyri-yaşayış sahəsidir. Ümumi sahəsi 1 624,1 kvadratmetr olan obyekt üçün start qiyməti 567 min manat müəyyən edilib. Hərracda iştirak etmək üçün 2 835 manat beh ödənilməlidir.

Digər əmlak isə kompleksin 7 saylı binasında yerləşən Avtodayanacaq-3 qeyri-yaşayış sahəsidir. Sahəsi 1 155,7 kvadratmetr olan obyektin start qiyməti 399 min manat, beh məbləği isə 1 995 manat təşkil edir.

Sözügedən əmlaklar üçüncü dəfə təkrar hərraca çıxarılır. Bu dəfə hərrac əvvəlki satış cəhdləri ilə müqayisədə start qiymətlərinin 30% aşağı salınması ilə keçiriləcək.

Mayya Hüseynova