"Apple" "iPhone 16e" modelində ilk dəfə istifadə etdiyi öz istehsalı olan "C1" modem çipindən sonra bu texnologiyanı tətbiq edəcəyi növbəti məhsulunu müəyyənləşdirib.

Valyuta.az xəbər verir ki, şirkət 2027-ci ildə təqdim ediləcəyi gözlənilən "M6" prosessoru üzərində iş aparır və bu yeni nəsil çipə öz mobil modemini birbaşa inteqrasiya etməyi planlaşdırır. Mövcud məlumata görə, "Apple" bu modemi istifadə edəcəyi növbəti məhsul kimi "M6" çipli "MacBook" modellərini seçib.

Bu yenilik sayəsində "MacBook" modelləri artıq yalnız "Wi-Fi" şəbəkəsinə bağlı qalmaq məcburiyyətində olmayacaq. Eyni zamanda, bu cihazlarda "GPS" və peyk bağlantısı kimi əlavə funksiyaların dəstəklənməsi də mümkündür.

Hazırda şirkət "MacBook Pro" seriyasını "M5" prosessoru ilə yeniləməyə hazırlaşır. Gözləntilərə əsasən, böyük dizayn dəyişiklikləri 2026-cı ildə, "MacBook Pro"nun 20 illik yubileyinə özəl buraxılacaq modeldə reallaşacaq. Həmin modeldə "M6" çip, daha incə "OLED" ekran və tamamilə yeni korpus dizaynı yer alacaq.

Qeyd edək ki, "Apple" bir müddətdir ki, "Qualcomm" şirkətindən asılılığını azaltmaq məqsədilə öz modem texnologiyasını inkişaf etdirir. Şirkət gələcəkdə "Mac" kompüterlərini tamamilə öz istehsalı olan avadanlıqla təchiz etməyi qarşısına məqsəd qoyub.

Sərvanə Rəmixanova