Süni intellekt aləti “Neptune.ai” "OpenAI"ın tərkibinə keçir

"OpenAI" süni intellekt modellərinin təlim proseslərində istifadə olunan alət və infrastrukturunu gücləndirmək məqsədilə Polşa mənşəli “Neptune.ai” şirkətini satın alacağını açıqlayıb. Tərəflər razılaşmanın maliyyə detalları barədə məlumat verməyiblər.

Valyuta.az “Bloomberg”ə istinadən xəbər verir ki, satınalma "OpenAI" səhmləri ilə maliyyələşdiriləcək.

Süni intellektin təlim prosesi milyonlarla neyron təbəqəsinin necə işlədiyini və qarşılıqlı təsirə girdiyini anlamağa əsaslanır. Bu təbəqələrdən toplanan texniki məlumatların təhlili modelin səhvlərini düzəltmək və performansını artırmaq baxımından mühüm əhəmiyyət daşıyır. Lakin məlumatların həm mürəkkəbliyi, həm də həcmi onların emalını çətinləşdirir.

“Neptune.ai” bu problemi aradan qaldırmaq üçün tədqiqatçılara model təbəqələrini məlumat itkisinə səbəb olan sıxılma (“downsampling”) olmadan izləməyə imkan verən platforma hazırlayıb. Bu yanaşma öyrənmə prosesinin daha aydın müşahidəsinə, qeyri-dəqiq və səmərəsiz elementlərin asanlıqla müəyyənləşdirilməsinə şərait yaradır. Platforma, həmçinin modelin səhvlərdən necə öyrəndiyini göstərən “gradient” izləmə funksiyası və aktivləşdirmə funksiyası analizini də asanlaşdıraraq modelin hansı neyronları işə salmalı olduğunu daha optimal şəkildə müəyyən etməyə imkan verir.

“Neptune.ai” hazırda "OpenAI" da daxil olmaqla 60 mindən çox süni intellekt tədqiqatçısı tərəfindən istifadə olunur. OpenAI bu platformanın təqdim etdiyi təcrübə izləmə, təbəqə təhlili və metrik müqayisə imkanlarını öz tədqiqat infrastrukturuna inteqrasiya etməyi planlaşdırır.

"OpenAI"ın baş elmi işçisi Yakub Paçotski bu barədə belə bildirib: “'Neptune.ai' mürəkkəb təlim proseslərini təhlil etməyi asanlaşdıran sürətli və dəqiq bir sistem qurub. Alətlərini təlim infrastrukturumuza daxil etməklə modellərin necə öyrəndiyinə dair görünüşümüzü artıracağıq”.

Şirkətin qurucusu və baş direktoru Pyotr Nyecvyec isə qeyd edib: “Yaxşı alətlər tədqiqatçıların ən yaxşı işlərini görməsinə şərait yaradır. OpenAI-a qoşulmaq bu vizyonu daha geniş miqyasda həyata keçirmək imkanı verir”.

“Neptune.ai” 4 mart tarixində müstəqil platformasını bağlayacağını, istifadəçilərin məlumatlarını köçürməsi üçün bələdçi və alətlər təqdim edəcəyini açıqlayıb. Bu satınalma OpenAI-ın son həftələrdə atdığı ikinci addımdır; şirkət yaxın vaxtda “Apple”ın sabiq əməkdaşları tərəfindən qurulan “Software Applications Inc.” şirkətini də öz tərkibinə qatmışdı.

Mayya Hüseynova