Robert Kiyosaki: “Uduzanlar pullarını məhz belə xərcləyir”

“Zəngin ata, Kasıb ata” kitabının müəllifi Robert Kiyosaki sərt fikirləri ilə tanınır. Onun yanaşmasına görə, maliyyə baxımından uğurlu insanlar ilə uğursuzlar arasında əsas fərq pula yanaşma tərzidir.

Valyuta.az xəbər verir ki, Kiyosaki öz investisiya fəlsəfəsindən kənara çıxanları açıq şəkildə “uduzanlar” adlandırmaqdan çəkinmir.

Donald Tramp ilə dostluq münasibətləri və zaman-zaman birgə müəllifliyi olan Kiyosaki üçün əsas prinsip pulun sizin üçün işləməsidir. Onun fikrincə, uzunmüddətli maliyyə artımı yaradan aktivlərə - xüsusilə daşınmaz əmlaka üstünlük verilməlidir. Qızıl, gümüş, digər əmtəələr və kriptovalyutalar isə ənənəvi pensiya fondlarından (401(k), IRA), istehlak mallarından və dəyər itirən aktivlərdən daha cəlbedici hesab olunur.

Bəs Kiyosakiyə görə “uduzanlar” pullarını necə xərcləyir?

Ənənəvi yolu seçmək: kiyosakinin tənqidi

"YouTube" videosunda Kiyosaki öz əvvəlki kitablarında verdiyi dərslərə qayıdaraq, onları "Bitcoin" kimi yeni investisiya trendləri ilə müqayisə edir. Kriptovalyutalara marağı dəstəkləsə də, onun fikrincə əsas şərt budur: sərmayə öz-özünü maliyyələşdirməlidir.

“Mən sizə deyə bilərəm: oxuyun, iş tapın, vergilərinizi ödəyin, çox çalışın, pul yığın və onu yatırın", - deyə Kiyosaki bildirir.

“Bunu hər uduzan edir. Uduzan, uduzan, uduzan. Ya da böyük bir ev alıb onu aktiv adlandırırlar, halbuki bu, öhdəlikdir. Ferrari, Lamborghini və ya Rolls-Royce alıb aktiv deyirlər. Bu da öhdəlikdir. Elə buna görə də uduzurlar".

Ev aktivdirmi, yoxsa öhdəlik?

Əlbəttə ki, ev texniki baxımdan aktivdir. Lakin Kiyosakiyə görə ipoteka, sığorta, texniki xidmət və vergilər kimi xərclər evi pul çıxaran öhdəliyə çevirir. Üstəlik, əksər insanlar evlərini planlaşdırdıqlarından daha tez satır və ya daha uzun müddət saxlayır ki, bu da onu likvid olmayan aktivə çevirir. Kiyosaki hesab edir ki, şəxsi yaşayış evi gəlir yaratmır və təqaüd dövrü üçün əsas maliyyə dayağı kimi görülməməlidir.

Maaşdan çox pul axını

Kiyosakinin fəlsəfəsinə görə, əsl aktivlər aşağıdakılardır:
Müsbət pul axını yaradan kirayə daşınmaz əmlaklar
Bizneslər
Dividend ödəyən səhmlər
Gəlir gətirən intellektual mülkiyyət

Maliyyə azadlığına aparan yol, onun fikrincə, passiv gəlir mənbələrinin yaradılmasıdır. Bu gəlirlər zamanla xərcləri üstələməlidir.
Kiyosaki tez-tez sadələşdirilmiş düşüncə tərzinə görə tənqid olunsa da, əsas məntiq aydındır: Aktivlər cibinizə pul qoyur, öhdəliklər isə pul çıxarır. Xərcləri azaltmaq faydalıdır, lakin gəliri artırmaq uzunmüddətli perspektivdə daha güclü strategiyadır. Gəlir artdıqca, xərclərlə bağlı narahatlıq da azalır.

Sərt yanaşma, amma düşündürən mesaj

Kiyosakinin metodları hamı tərəfindən qəbul edilmir. Tənqidçilər onun keçmiş iflaslarını və borcdan aqressiv istifadə etməsini riskli hesab edirlər. Buna baxmayaraq, istehlakçı düşüncəsindən investor düşüncəsinə keçid ideyası bir çoxları üçün dəyərli dərsdir.
Əgər siz “oxu, işlə, vergi ödə, pul yığ və 401(k)-yə yatır” yolunu seçmisinizsə, Kiyosakinin "Facebook" paylaşımına görə bu sizi “uduzan” kateqoriyasına salır. Bu sərt yanaşma ola bilər, lakin gəlir gətirən aktivlərə investisiya etmədən yalnız maaşa güvənmək maliyyə potensialınızı ciddi şəkildə məhdudlaşdırır.

Tənzilə Ağabalayeva