"Apple" satışlarda "Samsung"u geridə qoyaraq liderliyə yüksəldi

"Apple" 2025-ci ilin ilk rübündə qlobal smartfon satışlarına görə birinci yerə yüksəlib. 

Valyuta.az xəbər verir ki, analitiklər bu nəticəni yeni "iPhone 16e" modelinin təqdimatı və Yaponiyada, eləcə də Hindistanda yüksək tələbatla əlaqələndirirlər.

Qeyd olunur ki, "Apple" tarixində ilk dəfə olaraq rüblük satış payına görə bütün rəqiblərini geridə qoyaraq lider olub. "Samsung" 18% bazar payı ilə ikinci yerdə qərarlaşıb. Çin şirkətləri olan "Xiaomi", "vivo" və "OPPO" isə müvafiq olaraq üçüncü, dördüncü və beşinci yerləri bölüşüblər.

Bununla belə, "Counterpoint" araşdırmasında vurğulanır ki, dünya üzrə smartfon bazarında cari il ərzində ümumi eniş gözlənilir. Buna səbəb kimi ABŞ prezidenti Donald Trampın tətbiq etdiyi rüsumlar və davam edən qlobal iqtisadi qeyri-müəyyənliklər göstərilir.

Analitiklər qeyd edirlər ki, Trampın ticarət siyasətindəki qeyri-sabitlik inflyasiya risklərini artırmaqla yanaşı, həm də istehlakçı davranışlarına mənfi təsir edir. Nəticədə insanlar yeni telefon almaq qərarlarını təxirə salır, bu isə istehsal və tədarük zəncirinə təzyiq göstərir.

Apreldə açıqlanan qərarlar 2025-ci ilin birinci rübündə 'iPhone' satışlarına birbaşa təsir etməyib", – deyə "Counterpoint"in baş analitiki Ankit Malhotra bildirib.

Qlobal smartfon bazarında 2025-ci ilin birinci rübündə ümumilikdə 3% artım qeydə alınsa da, il ərzində tənəzzül proqnozlaşdırılır. Bütün bu qeyri-müəyyənliklərə baxmayaraq, "Apple" yeni məhsulu ilə öz mövqeyini gücləndirərək investorlar üçün də müsbət siqnal göndərmiş olub.

Sərvanə Rəmixanova