Qatar biletindən milyardlıq platformaya: “BlaBlaCar” modeli - SƏHƏR OXUSU

Avropanın ən böyük paylaşım iqtisadiyyatı layihələrindən biri olan “BlaBlaCar”ın yaranması təsadüfi bir müşahidədən başlayıb.

Valyuta.az xəbər verir ki, platformanın qurucusu Frederik Mazzella tələbəlik illərində qatar bileti tapa bilmədikdə, ailəsinin yanına gedə bilməsi üçün alternativ yol axtarmalı olmuşdu.

Yolun kənarında yüzlərlə boş oturacaqla gedən avtomobilləri gördükdə, sadə bir sual ortaya çıxdı: insanlar niyə eyni istiqamətə gedərkən xərci və yolu paylaşmır?

Bu müşahidə gələcəkdə Avropanın nəqliyyat vərdişlərini dəyişdirən bir platformaya çevrildi. Mazzella iqtisadiyyat, fizika və komanda psixologiyası üzrə biliyini bir araya gətirərək 2006-cı ildə ilk versiyanı hazırladı. O dövrdə nə paylaşım iqtisadiyyatı trend idi, nə də investorlar bu cür modellərə maraq göstərirdi. Mazzella isə insan davranışını əsas götürərək fərqli yanaşma qurdu: rahatlıq, təhlükəsizlik və etibar mexanizmləri üzərində dayanan sosial platforma.

“BlaBlaCar”ın uğurunun əsas səbəbi nəqliyyat boşluğunu iqtisadi fürsətə çevirməsi oldu. Avropanın bir çox ölkəsində qatar biletlərinin bahalığı və səyahət sıxlığı bu modelə geniş təbəqənin ehtiyac duyduğunu göstərdi. Sürücülər yol xərclərini bölüşərək qənaət edir, sərnişinlər isə ucuz və rahat səyahət imkanı qazanırdı. Platformanın reputasiya sistemi isə etibar problemini minimuma endirirdi.

Mazzellanın diqqəti çəkən yanaşmalarından biri odur ki, “BlaBlaCar” qısa məsafəli taksi və ya nəqliyyat xidməti kimi deyil, uzun məsafəli səyahət mədəniyyəti kimi inkişaf etdirildi. Bu fərq şirkəti bazarda öz kateqoriyasına sahib edən əsas amillərdən biri oldu. Bu gün “BlaBlaCar” 20-dən çox ölkədə fəaliyyət göstərir və milyonlarla istifadəçi ilə Avropanın ən böyük yol paylaşım şəbəkəsinə çevrilib.

Frederik Mazzellanın hekayəsi bir daha göstərir ki, biznes çox vaxt böyük investisiyadan deyil, sadə bir gündəlik problemi fərqli gözlə görməkdən başlayır. Boş oturacaqdan yaranan bu ideya indi nəqliyyat bazarında yenilikçi model kimi qəbul edilir və paylaşım iqtisadiyyatının ən uğurlu nümunələrindən biri sayılır.

Mayya Hüseynova