Qaçaqmalçılığa qarşı mübarizə: "Nvidia" çiplərini izləyəcək

"Nvidia" çiplərinin yerləşdiyi yeri izləyəcək yeni texnologiya tətbiq edir. Bu, qaçaqmalçılıq və ixrac məhdudiyyətlərinin pozulmasının qarşısını almağa kömək edəcək.

Valyuta.az xəbər verir ki, "Reuters"in məlumatına görə, sistem sürətləndiricilər "Nvidia" serverlərinə qoşulduqda yaranan şəbəkə gecikmələrindən istifadə edəcək və bu, çipin hansı ölkədə işlədiyini müəyyən etməyə imkan verəcək.

Şirkət vurğulayır ki, gizli məlumat ötürmə kanalları yoxdur; texnologiya standart şəbəkə qarşılıqlı əlaqəsinə əsaslanır və cihazların təhlükəsizliyinə təsir etmir. İlk olaraq bu funksiya "Blackwell" seriyasında olacaq, daha sonra "Hopper" və "Ampere" nəsillərində də tətbiq oluna bilər.

"Reuters" mənbələri təsdiqləyir ki, bu texniki nəzarət mümkündür və müştərilərin performansı və məxfiliyi zərər görmədən həyata keçirilə bilər.

Yaxınlarda Donald Tramp "Nvidia" H200-lərin Çinə tədarükünə icazə verib və bunun müqabilində şirkət satış gəlirinin 25%-ni ödəyəcək. Lakin FT-nin məlumatına görə, Çin tənzimləyiciləri eyni H200-lərin idxalı ilə bağlı öz məhdudiyyətlərini müzakirə edir. Pekin texnoloji müstəqilliyi sürətləndirmək və Amerikanın yarımkeçirici məhsullarından asılılığı azaltmaq istəyir.

Paşa Məmmədli