ABŞ turistlərdən 5 illik sosial media məlumatları tələb edə bilər

ABŞ Gömrük və Sərhəd Mühafizəsi yeni təklif irəli sürüb.

Valyuta.az xəbər verir ki, sənədə əsasən, "Visa Waiver Program"a daxil olan 42 ölkənin vətəndaşları ABŞ-yə səfər üçün doldurduqları ESTA ərizəsinə son 5 ilin sosial media tarixçəsini əlavə etməyə məcbur ola bilər.

Təklifə həmçinin 5 ilin telefon nömrələri, 10 ilin e-poçt ünvanları və biometrik məlumatlar (barmaq izi, DNT, iris fotosu) kimi əlavə tələblər də daxildir.

Bu dəyişiklik Tramp administrasiyasının ölkə təhlükəsizliyi ilə bağlı sərəncamına uyğun hazırlanıb. Mütəxəssislər hesab edir ki, bu addım turizmə mənfi təsir göstərə və şəxsi məlumatların qiymətləndirilməsində “yeni dövr” başlada bilər.

2025-ci ilin yanvar-oktyabr aylarında bu ölkələrdən ABŞ-a 9,3 milyon turist səfər edib. Yeni qaydaların qəbul olunacağı halda turizm axınının azalacağı ehtimal olunur.

Sərvanə Rəmixanova