Nvidia “Synopsys”ə 2 milyard dollar investisiya edib

ABŞ-ın “Nvidia” şirkəti çip dizaynı üçün proqram təminatı hazırlayan “Synopsys”in səhmlərinə 2 milyard dollar investisiya edib.

Valyuta.az “Forbes”a istinadən xəbər verir ki, şirkətlər elmi-tədqiqat qruplarının yeni məhsulları daha dəqiq, daha sürətli və daha az xərclə layihələndirməsinə, modelləşdirməsinə və sınaqdan keçirməsinə imkan verəcək strateji tərəfdaşlıq elan ediblər. “Nvidia” şirkəti “Synopsys”in səhmlərini bir ədəd üçün 414,79 dollar qiymətinə alıb.

Şirkətlərin birgə bəyanatında tərəfdaşlığın tədqiqat və inkişaf sahəsində əhəmiyyətli üstünlüklər yaradacağı bildirilib. Qeyd olunub ki, bu əməkdaşlıq nəticəsində əvvəlcə həftələrlə vaxt aparan işləri artıq bir neçə saat ərzində yerinə yetirmək mümkün olacaq.

“Nvidia”nın baş direktoru Censen Huanq CNBC-yə açıqlamasında bu əməkdaşlığı “möhtəşəm razılaşma” adlandırıb. Onun sözlərinə görə, bu tərəfdaşlıq çip dizaynı və mühəndislik sahəsində inqilab yaratmağa hesablanıb. “Synopsys”in baş direktoru Səssin Qazi də qeyd edib ki, tərəfdaşlıq sayəsində bir vaxtlar uzun müddət tələb edən işlər xeyli sürətlənəcək.

CNBC bildirir ki, “Nvidia” süni intellektin sürətli inkişafı fonunda ən çox fayda əldə edən şirkətlərdən biridir. Şirkət süni intellekt modellərinin hazırlanması və təlimində əsas rol oynayan qrafik prosessorlar (GPU) istehsal edir. Censen Huanq deyib: “Biz artıq ənənəvi mərkəzi prosessorlara əsaslanan hesablama üsulundan qrafik prosessorlar üzərindən həyata keçirilən sürətli hesablama üsuluna keçid edirik. Dünya yeni hesablama modelinə keçir.”

Məlumatın yayılmasından sonra “Synopsys”in səhmləri 4%, “Nvidia”nın səhmləri isə 1% artıb. CNBC əlavə edir ki, bu iki şirkət uzun müddətdir əməkdaşlıq edir və yeni açıqlama mövcud tərəfdaşlığın inkişafıdır.

Qeyd edək ki, “Nvidia” 2026-cı maliyyə ilinin üçüncü rübü üzrə maliyyə hesabatını noyabr ayında təqdim edib. Şirkətin gəliri analitiklərin gözləntilərini üstələyib və dördüncü rüb üçün də güclü proqnoz verilib. İllik müqayisədə “Nvidia”nın gəliri 62% artaraq rekord 57 milyard dollara çatıb. Xalis mənfəət isə 65% artaraq 31,91 milyard dollar təşkil edib. Düzəliş olunmuş hər səhmə mənfəət 1,3 dollar olub. LSEG tərəfindən sorğulanan analitiklər 54,92 milyard dollar gəlir və hər səhmə 1,25 dollar mənfəət gözləyirdi.

Xatırladaq ki, oktyabrın sonunda “Nvidia” bazar dəyəri 5 trilyon dollara çatan ilk ictimai şirkət olub.