Brilyant bazarında son durum: Qiymətlər niyə artır?

Dünyada brilyantların qiyməti son altı ay ərzində 5–10 faiz bahalaşıb. 

Valyuta.az xəbər verir ki, bu barədə "Moneymatika.ru" xidmətinin baş direktoru Maksim Molderf məlumat verib.

Onun sözlərinə görə, “fantaziya” tipli və iri ölçülü brilyantlar son yarımildə 5–10 faiz bahalaşsa da, digər kateqoriyalar artıq ötən ilin ortalarından sabitləşib. Əksinə, aşağı qiymət seqmentində qiymətlər azalmaqda davam edir. Bu, süni brilyant bazarının sürətlə böyüməsi ilə bağlıdır — həmin məhsullar kütləvi istehlak seqmentini ələ keçirib. 

Molderf qeyd edib ki, bu seqment yaxın illərdə bərpa olunmayacaq, lakin nadir və iri təbii daşlar bahalaşmağa davam edəcək və getdikcə investisiya obyektinə çevrilir. Onun fikrincə, hazırda brilyant qiymətləri minimum səviyyələrdədir və məhz bu nöqtələrdən adətən yeni artım başlayır.

Ekspert bildirib ki, hazırkı vəziyyət investorlar üçün brilyant almaq baxımından nadir bir fürsət yaradır.

Qiymət artımının əsas səbəbi təbii almazların azlığıdır. Molderfin sözlərinə görə, 2017–2023-cü illər arasında almazların qlobal hasilatı 39 milyon karat azalıb. Hazırda dünyanın bütün almazlarının 90 faizdən çoxu cəmi altı ölkədə çıxarılır və bəzi yataqlar artıq tükənmək üzrədir. O əlavə edib ki, hasilat getdikcə bahalaşır və təklif hər il azalır — bu isə bazarı dəstəkləyən əsas amildir.

Molderf vurğulayıb ki, brilyantlar hələ də “ən yığcam və likvid pul ekvivalenti” olaraq qalır. Onun sözlərinə görə, bu, kapitalın ən mobilləşmiş formasıdır — brilyantları saxlamaq, daşımaq və üzərində gəzdirmək asandır. İnvestisiya məqsədli daş zinət əşyasına yerləşdirilsə belə, o, aktiv olaraq dəyərini qoruyur.

Ekspert qeyd edib ki, ən yüksək gəlirliliyi məhz iri daşlar göstərir, çünki onlar həm daha nadirdir, həm də süni analoqların təsirinə daha az məruz qalır.

“Ümumilikdə brilyantlara əsasən, əmanətlərini inflyasiya və valyuta risklərindən qorumaq istəyənlər üstünlük verir. Onlar dollarla qiymətləndirilir, lakin istənilən valyutada asanlıqla satıla bilir. Digər bir üstünlük isə fond bazarlarının dalğalanmalarından aşağı asılılıqdır. Üstəlik, bir çox sahiblər üçün brilyantlar yalnız maliyyə deyil, həm də emosional dəyər daşıyır — bunlar həm istifadə oluna, həm irsən ötürülə, həm də qiymət itirmədən qoruna bilən zinət əşyalarıdır”, deyə Molderf bildirib.

Paşa Məmmədli