“Brevo” 583 milyon dollar investisiya alıb

Fransa mənşəli “Brevo” şirkəti, 583 milyon dollar həcmindəki sərmayə turunda “General Atlantic”, “Oakley Capital”, “Bpifrance” və “Bridgepoint” kimi investorların diqqətini cəlb edib.

Valyuta.az xəbər verir ki, müştəri əlaqələrinin idarə olunması və marketinq avtomatlaşdırması sahəsində ixtisaslaşan şirkətin dəyəri 1 milyard dollar həddini keçib.

Yeni sərmayə turu nəticəsində “Brevo”nun səhmdar strukturu əhəmiyyətli dəyişikliklərə məruz qalıb. “General Atlantic” və “Oakley Capital” birlikdə şirkətin 25 faizinə sahib olaraq əsas yeni investorlar sırasına daxil olublar. Mövcud səhmdarlar olan “Bpifrance” və “Bridgepoint” isə hər biri şirkətdə 24 faiz pay saxlayaraq mövqelərini qoruyublar.

Bununla yanaşı, “Partech” şirkəti əlindəki bütün səhmləri sataraq “Brevo”dan tam şəkildə çıxıb. Şirkət rəhbərliyi və əməkdaşlarından ibarət daxili səhmdarlar qrupu isə 26 faizlə “Brevo”nun ən böyük səhmdar qrupunu təşkil etməyə davam edir.

“Brevo” cəlb etdiyi yeni sərmayəni ABŞ bazarında genişlənmək, süni intellekt sahəsində inkişafları sürətləndirmək və məhsul portfelini yeni satınalmalar vasitəsilə böyütmək məqsədilə istifadə edəcək.

2012-ci ildə Armand Tiberj tərəfindən “Sendinblue” adı ilə təsis edilən şirkət, 2023-cü ildə fəaliyyət dairəsini genişləndirdiyi üçün adını “Brevo” olaraq dəyişib. Artıq yalnız e-poçt marketinq xidməti deyil, CRM, marketinq avtomatlaşdırması, müştəri məlumatlarının idarə olunması və çoxkanallı ünsiyyət imkanları təqdim edən platformaya çevrilib.

Hazırda “Brevo” şirkətlərə e-poçt, SMS, WhatsApp, canlı çat, push bildirişləri və inteqrasiya olunmuş telefon zəngləri kimi çoxsaylı rabitə kanallarını vahid interfeys üzərindən idarə etməyə imkan verir. Platforma, istifadəçi davranışına əsaslanan avtomatlaşdırılmış proseslər və seqmentasiya funksiyaları ilə marketinq fəaliyyətlərini optimallaşdırır.

Mayya Hüseynova